Recorren os novos pregos do Servizo de Axuda no Fogar da Coruña por posibles deficiencias laborais e de contratación
Os novos pregos do contrato do Servizo de Axuda no Fogar (SAF) do Concello da Coruña afrontan a súa primeira impugnación. Movemento Sumar Galicia-A Coruña presentou un recurso ante o Tribunal Administrativo de Contratación Pública da Comunidade Autónoma de Galicia (TACGAL), no que solicita a revisión de diferentes cláusulas ao entender que poderían non axustarse á normativa en materia laboral, de prevención de riscos e de contratación pública.
O novo contrato do SAF, licitado polo Concello para os próximos anos cun orzamento de 25,5 millóns de euros e dividido en seis lotes, foi presentado polo Goberno local como unha ferramenta para mellorar a estabilidade do servizo e as condicións da súa prestación.
A formación política cuestiona, entre outros aspectos, a inclusión de novas tarefas para o persoal do servizo, como limpezas extraordinarias, limpeza de cristais ou pequenas reparacións domésticas, ao considerar que os pregos non delimitan con suficiente precisión o alcance destas funcións nin os medios para realizalas.
Outro dos puntos recollidos na impugnación fai referencia ao sistema de fichaxe mediante xeolocalización e á necesidade de garantir que o orzamento da licitación contemple todos os custos laborais asociados á prestación do servizo, incluídos os desprazamentos entre domicilios, que o convenio colectivo considera tempo efectivo de traballo.
A portavoz de Movemento Sumar Galicia-A Coruña, Trinidad Palacios, traballadora do propio Servizo de Axuda no Fogar, sostén que o novo contrato incorpora máis obrigas para o persoal sen que se recollan melloras salariais específicas nos pregos e reclama que o Concello abra un proceso de diálogo coas traballadoras para revisar o documento.
O recurso será agora analizado polo TACGAL, que deberá decidir se procede modificar algunha das cláusulas da licitación ou manter o procedemento nos seus termos actuais.