Queixas polo autobús metropolitano chegan a unha asemblea aberta do BNG
O BNG da comarca da Coruña celebrou unha asemblea aberta para analizar a situación do transporte metropolitano por autobús e recoller novas achegas das persoas usuarias. A formación nacionalista vén denunciando desde hai tempo deficiencias no servizo, tanto nas frecuencias e horarios como no deseño das liñas e na información dispoñible para a cidadanía.
Un dos puntos centrais do encontro foi a nova parada situada na rúa Manuel Casás, no centro da Coruña, que o BNG considera problemática pola súa falta de seguridade e operatividade. Segundo a formación, a parada só ten capacidade para tres autobuses, malia que por ela pasan a diario preto de 200 vehículos de máis de 100 liñas e arredor de 2.000 persoas.
Os nacionalistas critican que a Xunta de Galicia implantase neste punto unha parada con dimensións insuficientes para o volume de usuarios e servizos que soporta. O BNG xa trasladou esta cuestión ao Parlamento galego en varias ocasións e anunciou que volverá facelo para reclamar solucións aos problemas detectados.
Na asemblea interviñeron os deputados Iria Taibo e Paulo Ríos. Taibo, deputada da comarca da Coruña, referiuse á situación do transporte metropolitano na área, con varios puntos conflitivos, problemas acumulados e, segundo expuxo, unha planificación deficiente das liñas e dos horarios. Pola súa banda, Ríos, portavoz de infraestruturas e transporte do Grupo Parlamentario do BNG, abordou o funcionamento dos contratos coas concesionarias, a falta de transparencia e as consecuencias sociais das deficiencias do servizo.
Durante o encontro tamén tomaron a palabra varias persoas usuarias, que trasladaron queixas relacionadas coa falta de adaptación do transporte en momentos de incremento da demanda, como o aumento de voos no aeroporto de Alvedro polas obras en Lavacolla ou a celebración de eventos de lecer na comarca. Tamén alertaron da saturación nas horas punta, da dificultade de acceso para persoas con mobilidade reducida, da perigosidade nalgúns traxectos con autobuses cheos e da perda de utilidade dun servizo que, segundo apuntaron, leva a moitos usuarios a optar por medios de transporte propios cando teñen esa posibilidade.
O BNG defende que o transporte metropolitano debe reforzarse por razóns sociais, ambientais e de mobilidade. A formación considera que se trata dun servizo esencial para a comarca e lamenta a que cualifica como falta de compromiso do goberno galego cun sistema público que, ao seu xuízo, precisa melloras urxentes.