Preto de 7.000 mulleres percorren A Coruña na Carreira da Muller
Case 7.000 mulleres participaron este domingo na Carreira da Muller da Coruña, unha proba de 6,3 quilómetros que percorreu diferentes rúas da cidade nunha xornada marcada polo deporte, a igualdade e a solidariedade.
A saída produciuse ás 10.00 horas desde a avenida de Bos Aires, nas proximidades do Complexo Deportivo de Riazor, e correu a cargo da alcaldesa, Inés Rey, acompañada polo concelleiro de Deportes, Manuel Vázquez. A concelleira de Benestar Social, Participación e Igualdade, Nereida Canosa, participou posteriormente na entrega de premios.
Andrea Díaz Iglesias foi a primeira clasificada, cun tempo de 25:05, seguida por Noa Mirantes e Nerea Sánchez, que completaron as tres primeiras posicións.
As participantes estiveron acompañadas polo público ao longo do percorrido, nun ambiente festivo que deixou novamente a imaxe de miles de mulleres avanzando xuntas polas rúas da cidade.
“A Coruña volveu demostrar hoxe o seu compromiso coa igualdade cunha imaxe, a de miles de mulleres de diferentes xeracións compartindo as nosas rúas, que representa tamén a vontade dunha cidade que avanza coas súas mulleres”, sinalou Inés Rey.
A alcaldesa destacou tamén o carácter social da carreira, que, segundo indicou, “representa deporte e hábitos de vida saudables, pero tamén visibilidade, reivindicación e solidariedade para seguir avanzando cara a unha igualdade plena e efectiva”.
A proba mantivo nesta edición a súa vertente de sensibilización arredor de diferentes cuestións que afectan ás mulleres. Entre elas, a loita contra a violencia machista, coa presenza do teléfono 016 nos dorsais, e a prevención, sensibilización e investigación sobre o cancro de mama, incluída a visibilización do cancro de mama metastásico.
A dimensión solidaria contou coa participación de entidades e iniciativas como ACNUR, ACADAR, Semilla para el Cambio, Auga Dragon Boat e Bolboretas Coruña. A organización destinará integramente a ACADAR a recadación dos dorsais solidarios e achegará 1.200 euros a Semilla para el Cambio para apoiar os seus programas de empregabilidade e autonomía económica para mulleres en situación de vulnerabilidade.
A xornada incluíu tamén unha homenaxe á atleta paralímpica galega e colaboradora de ACNUR Adiaratou Iglesias, que se realizou no momento da saída da carreira.
Iglesias foi campioa paralímpica dos 100 metros e medalla de prata nos 400 metros nos Xogos de Toquio 2020. Nesta edición da carreira tamén se deu visibilidade ao documental ‘Adi, filla da luz’, impulsado por ACNUR e centrado na súa historia.
Inés Rey puxo en valor a importancia de contar con referentes femininos no ámbito deportivo, especialmente entre as xeracións máis novas, e sinalou a Adiaratou Iglesias como exemplo “para que as nenas medren sabendo que non hai espazos que non sexan para elas e que poden chegar tan lonxe como se propoñan”.
A chegada das participantes á meta pechou unha xornada na que a organización combinou a práctica deportiva coa igualdade e a solidariedade.