Paderne celebrará o Entroido o luns 12 de febreiro
O Concello de Paderne celebrará a súa festa grande de Entroido o luns 12 de febreiro na Carpa do Telleiro. O lugar acollerá as actividades, pensadas para que todos os veciños e todas as veciñas, sen importar a idade, poidan gozar delas.
A partir das 17.30 horas comeza a Festa Infantil con obradoiros, inchables, concurso con diferentes premios aos mellores disfraces, e mesmo unha merenda para que os pequenos e pequenas pasen unha tarde estupenda.
De seguido, ás 20.30 horas a festa continúa coa actuación de Aixa Romay e a presentación dun dos eventos máis importantes do ano no municipio, como é o Entroido de Samede.
O prato forte da tarde será o Concurso de Disfraces para maiores de 16 anos, con diferentes premios en metálico, que irá acompañado dunha degustación de pinchos para todas as persoas asistentes.
Desde o Concello de Paderne animan a todos e todas, veciñanza e visitantes, a gozar dunha fantástica tarde de Entroido no Telleiro chea de disfraces, música e moita festa.