Outras 80 vivendas protexidas proxéctanse nas novas urbanizacións de Mera e Oleiros
O Goberno municipal prevé impulsar outras 80 vivendas protexidas nas novas urbanizacións que se están desenvolvendo en Mera e no núcleo urbano de Oleiros. A iniciativa súmase ás promocións que o Concello leva impulsado nos últimos tres anos, período no que se promoveron 296 pisos protexidos en distintos puntos do municipio.
Nos primeiros meses de 2027 abrirase unha convocatoria pública para que as persoas interesadas poidan inscribirse e participar no proceso. O sistema previsto será o da constitución de cooperativas, mentres que os prezos de venda das vivendas estarán fixados pola Xunta de Galicia.
O anuncio prodúcese tras a entrada en vigor dunha nova liña de axudas estatais que contempla préstamos ao 0 % de xuro para afrontar o pagamento da entrada. Esta medida busca reducir unha das principais barreiras económicas para acceder a unha vivenda protexida.
Máis de 1.200 vivendas protexidas desde 1992
O Goberno local sitúa a súa actuación no ámbito da planificación urbanística e da creación de solo para construír vivenda. Segundo os datos facilitados polo Concello, desde 1992 construíronse no municipio un total de 1.286 pisos protexidos, unha cifra que inclúe as promocións actualmente en construción ou cuxo inicio é inminente.
Entre estas actuacións figuran promocións en Perillo, Dorneda, Mera, Oleiros e Montrove. A relación municipal recolle, entre outras, 96 vivendas en Xaz, na parroquia de Dorneda; 28 na rúa Eduardo Galeano, en Mera; e outras promocións no Pinar do Río e na rúa A Pezoca, ademais de actuacións en Perillo e Montrove. O Concello identifica as promocións de O Paraíso e Icaria como iniciativas privadas.
O Goberno local defende que o seu papel se centra na ordenación do territorio e no desenvolvemento urbanístico, mentres atribúe ao Estado e ás comunidades autónomas as principais competencias para intervir no mercado da vivenda.
O Concello tamén vincula as dificultades actuais de acceso á vivenda a factores como a escaseza de vivenda pública, a proliferación de pisos turísticos, a especulación inmobiliaria e o encarecemento dos materiais de construción. Neste contexto, considera que o aumento da oferta protexida é unha das vías para facilitar o acceso a unha vivenda a prezos regulados.