Os sindicatos acusan á patronal de 'facer un teatrillo' e de bloquear a negociación do convenio do comercio da alimentación
O conflito polo convenio colectivo do comercio de alimentación da provincia da Coruña segue sen desbloquearse tras tres xornadas de folga. Desde a CIG aseguran que as empresas manteñen practicamente a mesma proposta desde o inicio das negociacións e que non existen avances suficientes para pechar un acordo.
'Seguimos esperando que se poñan a negociar', afirma Roberto Pérez Vila, representante da CIG na mesa do convenio. O sindicato considera que a negociación está bloqueada e acusa as empresas de limitarse a repetir a súa oferta inicial sen introducir melloras substanciais.
Salarios, conciliación e antigüidade
O apartado económico continúa sendo o principal punto de desacordo. Segundo a CIG, a proposta empresarial contempla unha subida do 3% o primeiro ano e do 2% nos seguintes, dentro dun convenio de catro anos.
Para o sindicato, esa oferta é insuficiente porque 'non garante nin sequera o IPC'. A central reclama incrementos salariais que permitan recuperar poder adquisitivo, ademais de melloras en conciliación, recoñecemento da antigüidade e unha duración máis curta do convenio.
A CIG tamén defende a negociación dun convenio galego para o sector, co obxectivo de evitar diferenzas entre provincias. 'As mesmas empresas, cos mesmos beneficios, pagan moito máis en Pontevedra', sinala Pérez Vila.
Denuncias por prácticas durante a folga
A central sindical asegura que varias empresas do sector puxeron en marcha medidas para reducir o impacto dos paros. Entre as prácticas denunciadas citan a contratación de persoal para os días de folga, o traslado de traballadores doutras provincias, cambios na organización loxística, peticións de horas extra e supostas presións para que parte da plantilla non secundase a folga.
'Iso está denunciado e demostrarémolo onde corresponde', afirma o representante da CIG.
Un seguimento que o sindicato cifra no 80%
'O seguimento ronda o 80% na maioría dos supermercados. Algúns pecharon e outros abriron a duras penas, con encargados e persoal temporal', explica Pérez Vila.
Segundo o sindicato, a incidencia foi especialmente visible nas tendas que conseguiron abrir, pero que o fixeron con moitas limitacións. A central asegura que varios supermercados funcionaron con seccións pechadas, sen servizo habitual en frescos e con problemas de abastecemento derivados do paro nos centros loxísticos.
A CIG sinala tamén que houbo establecementos nos que traballaron equipos moi reducidos respecto ao cadro de persoal habitual. 'Tendas de 30 ou 40 traballadores estaban con cinco', afirma Pérez Vila, que considera que esa situación demostra o impacto real da folga malia que algúns centros mantivesen as portas abertas.
Para o sindicato, o feito de que un supermercado abrira non significa que a actividade fose normal. A central insiste en que moitos centros funcionaron 'baixo mínimos', con colas, falta de persoal e dificultades para repoñer produto, especialmente despois da incidencia do paro nos almacéns e na distribución.
Sen nova data para negociar
Polo momento non hai unha nova reunión fixada para retomar as conversas. A CIG asegura que segue á espera dunha convocatoria para volver á mesa. 'Estamos esperando que nos chamen para negociar', resume Pérez Vila.
Mentres non haxa avances, o sindicato non descarta manter as mobilizacións. A central pide comprensión á clientela e insiste en que o obxectivo das protestas é conseguir un convenio 'digno' para as persoas que traballan no comercio de alimentación da provincia.