Os campamentos xuvenís de Culleredo pechan a edición de verán tras achegar 50 disciplinas deportivas
O Concello de Culleredo puxo o punto final aos seus campamentos municipais para mozos e mozas, unha actividade na que participaron un total de 54 rapaces e rapazas de entre 12 e 18 anos.
A proposta tivo o deporte como eixo principal durante o inicio do verán e incluíu medio cento de disciplinas deportivas. As persoas participantes puideron practicar actividades acuáticas como kaiak, surf ou pádel surf, así como outras modalidades como tiro con arco, escalada, béisbol, skate ou jumping, entre outras.
Como peche da actividade, un grupo realizou unha visita ao Aquapark de Cerceda e outro celebrou unha acampada na Reitoral de Celas.
A concelleira de Educación, Deportes e Xuventude, Cristina Pardo, destacou que cos campamentos para mozos e mozas “buscamos un programa de alternativas de lecer saudables e baseadas no deporte como modalidade que ten unha gran acollida nestas idades”.
A estes campamentos xuvenís súmanse as Mañás de Campamento do Concello, dirixidas a nenos e nenas de 3 a 12 anos como alternativa de conciliación durante os meses de xullo e agosto.