Ordes recoñece o talento do alumnado distinguido con Premios MEGAU e Matrículas de Honra
O Salón de Plenos do Concello de Ordes acolleu unha recepción oficial para homenaxear o alumnado da comarca que rematou a súa formación no IES Ordes con Premios MEGAU ou Matrícula de Honra ao finalizar Bacharelato.
O acto estivo presidido polo alcalde, José Luis Martínez Sanjurjo, e contou coa presenza de representantes da Consellería de Educación, da Mancomunidade de Ordes, dos concellos de Cerceda e Frades, das direccións de centros educativos da comarca e das familias dos estudantes recoñecidos.
Durante a xornada, o rexedor destacou o esforzo de todo o alumnado que este curso rematou 2º de Bacharelato no IES Ordes e subliñou que cada estudante é motivo de orgullo para a comunidade educativa, máis alá das cualificacións obtidas.
Un dos momentos máis destacados chegou coa intervención dos trece alumnos e alumnas homenaxeados, que compartiron a súa experiencia académica, os retos superados e os proxectos formativos que iniciarán nos próximos meses.
O recoñecemento recaeu en estudantes de Ordes, Cerceda e Frades. Desde o Concello destacaron o compromiso coa educación, o mérito e o talento da mocidade, así como o traballo dos centros educativos e das familias no acompañamento do alumnado.