Oleiros converterase no centro da retransmisión mundial da eclipse solar do 12 de agosto
Oleiros será un dos principais escenarios da cobertura informativa da eclipse solar do vindeiro 12 de agosto. A Aula do Mar de Mera converterase no centro de operacións desde o que se realizará a retransmisión especial do fenómeno astronómico, cuxo sinal será distribuído a televisións de distintos puntos de España e tamén a cadeas internacionais.
Desde estas instalacións emitiranse os diferentes programas e informativos especiais dedicados á eclipse, convertendo o municipio nun dos puntos de referencia para seguir un dos acontecementos astronómicos máis destacados das últimas décadas.
Ademais da cobertura informativa, a Aula do Mar albergará o Posto de Mando Avanzado do dispositivo especial preparado para esa xornada. Desde alí coordinaranse os servizos de seguridade e emerxencias co obxectivo de atender calquera incidencia que poida producirse durante unha xornada na que se espera unha importante afluencia de visitantes.
O operativo contará con máis dun cento de efectivos municipais entre Policía Local, Servizo Municipal de Emerxencias, Protección Civil e Servizo de Salvamento e Socorrismo. O seu labor centrarase en garantir a seguridade das persoas asistentes e minimizar as afeccións ao tráfico nas diferentes zonas do municipio.
Con motivo da instalación dos equipos técnicos e da preparación do dispositivo especial, a Aula do Mar modificará temporalmente o seu horario de apertura. O martes 11 de agosto abrirá unicamente entre as 12.00 e as 14.00 horas, mentres que o mércores 12 permanecerá pechada durante toda a xornada.