Oleiros carga contra a futura lei de educación dixital da Xunta polo uso de tecnoloxía nas aulas
O Concello de Oleiros expresou o seu rexeitamento ao anteproxecto da Lei de educación dixital de Galicia, presentado pola Xunta, ao considerar que pode ter consecuencias negativas para a saúde mental e física da infancia e da mocidade. O goberno local sostén que a norma afonda nun modelo educativo excesivamente dependente das pantallas e reclama unha escola baseada no contacto humano, o papel e a interacción directa.
A futura lei, que iniciou este 23 de abril o seu período de exposición pública, pretende regular a integración da educación dixital no sistema educativo galego. Segundo a Xunta, o texto busca garantir un uso seguro, responsable e equitativo da tecnoloxía nos centros, con medidas como a creación dunha identidade dixital para o alumnado dos centros públicos a partir de 5º de Primaria, mediante unha conta de correo electrónico corporativa para fins educativos.
O anteproxecto tamén introduce a regulación do uso da intelixencia artificial, o dereito á desconexión dixital, as canles oficiais de comunicación entre centros e familias, a prohibición de gravar as clases sen autorización e o reforzo da limitación dos teléfonos móbiles nos centros educativos. A Xunta prevé que a norma poida ser aprobada antes de que remate o ano.
Desde Oleiros, con todo, a lectura é radicalmente crítica. O Concello considera 'indignante' que se contemple facilitar correo electrónico a nenos e nenas duns 10 anos e alerta de que a exposición temperá a dispositivos tecnolóxicos non supón, ao seu xuízo, un avance pedagóxico, senón un retroceso. O executivo local vincula o abuso das pantallas con problemas como ansiedade, déficit de atención, illamento social e dependencia.
O goberno municipal acusa a Xunta de ignorar informes científicos sobre os efectos adversos dun uso excesivo da tecnoloxía en idades temperás e emprega un ton especialmente duro ao comparar o impacto das pantallas co dano social provocado pola heroína nos anos 80. Para o Concello, a dixitalización sen control pode deteriorar a capacidade crítica dos menores e condicionar o seu desenvolvemento.
Fronte a ese modelo, Oleiros reivindica o seu propio investimento municipal en programas educativos presenciais e comunitarios. O Concello cifra nun millón de euros a achega destinada a actividades escolares e de prevención, entre elas excursións, deportes, concertos, hortas escolares, danza, visitas ás bibliotecas, programas contra as adiccións, mediación en conflitos, alimentación saudable, igualdade de xénero, educación afectivo-sexual e tamén uso das novas tecnoloxías.
O executivo local defende que o progreso educativo non debe medirse polo tempo que o alumnado pasa conectado a unha tableta, senón pola capacidade de garantir unha infancia sa, creativa e libre de dependencias. Por iso, Oleiros anuncia que continuará defendendo un modelo educativo no que a tecnoloxía teña un papel limitado e subordinado á convivencia, á aprendizaxe presencial e ás relacións humanas.