O turismo medra un 7,6 % en Miño e deixa case 400 peregrinos máis durante o verán
O verán deixou un balance positivo para o turismo en Miño, con 2.855 persoas atendidas na Oficina de Turismo municipal durante os meses de xullo e agosto. A cifra supón un 7,6 % máis que no mesmo período de 2025, cando se contabilizaran 2.652 visitantes.
Un dos datos que máis destaca é o incremento do número de peregrinos que atravesaron o municipio. Durante esta temporada alta rexistráronse 1.829 peregrinos, fronte aos 1.430 do ano anterior. Son case 400 camiñantes máis que acudiron á oficina durante os dous meses de maior actividade turística.
Tamén aumentou de maneira notable a presenza de visitantes internacionais. As consultas realizadas por turistas estranxeiros pasaron de 505 a 675, o que representa un incremento superior ao 33 %. Italia foi o principal país de procedencia, seguido de Estados Unidos, Alemaña, México e Portugal.
Por procedencia, o turismo nacional continúa sendo maioritario. O 58,6 % das persoas atendidas procedía doutras comunidades autónomas españolas. Madrid e Andalucía mantéñense entre os principais mercados, aínda que durante o pasado agosto os visitantes andaluces superaron aos madrileños, con 272 consultas fronte a 227.
As praias e as rutas concentran boa parte do interese
As consultas recibidas na Oficina de Turismo permiten coñecer tamén cales son os principais atractivos buscados polos visitantes. Entre os temas máis habituais están as rutas pola contorna, as praias, as excursións en barco e as actividades para realizar con menores.
A oferta turística de municipios e espazos próximos tamén esperta interese. As Fragas do Eume aparecen entre os lugares polos que máis preguntan os visitantes, mentres que este ano tamén houbo consultas relacionadas co eclipse e coas rutas interpretativas do Colexio Oficial de Arquitectos de Galicia.
No caso dos peregrinos, as principais consultas están relacionadas co selado da credencial, así como coa procura de restaurantes e outros servizos gastronómicos e culturais.
O transporte, unha das principais preocupacións
Os horarios e as conexións de transporte público tamén forman parte das consultas habituais. Moitos visitantes solicitan información para desprazarse ata A Coruña ou Ferrol, segundo os datos da Oficina de Turismo.
Desde este departamento sinalan as dificultades que existen actualmente para consultar os horarios dos autobuses e as baixas frecuencias ferroviarias. En concreto, apuntan que os horarios dos autobuses non se poden descargar desde a páxina web de Monbus e que a frecuencia dos trens resulta insuficiente para determinadas necesidades de mobilidade.
Os datos recollidos durante xullo e agosto mostran así un aumento da actividade turística, cun crecemento tanto do número total de visitantes como do fluxo de peregrinos e da chegada de turistas procedentes doutros países.