O sabor do mar e da horta únense nas Xornadas Gastro-Miño para impulsar o produto local
As Xornadas Gastro-Miño reuniron esta semana a numeroso público nunha cita gastronómica centrada na promoción do produto pesqueiro elaborado e transformado con ingredientes da terra. A iniciativa nace co obxectivo de impulsar novas formas de valorización dos recursos do mar a través da innovación culinaria e da transformación artesanal dos alimentos.
Durante a actividade, as persoas asistentes puideron seguir en directo varias demostracións de cociña realizadas polos integrantes do Espazo Gastronómico MarMiño, un obradoiro de formación e emprendemento impulsado polo Concello de Miño para fomentar novas oportunidades laborais vinculadas ao sector pesqueiro.
Entre as elaboracións preparadas destacaron as albóndegas de peixe con salsa de cebola chata de Miño, as hamburguesas de peixe e un paté de mexillóns, propostas que combinan os produtos do mar con materias primas de proximidade e que buscan abrir novas posibilidades de comercialización para o sector.
O Espazo Gastronómico MarMiño forma parte do proxecto 'Miño Emprende no Mar: Artesanía alimentaria e transformación do produto pesqueiro', unha iniciativa destinada a promover a diversificación das actividades vinculadas ao mar mediante a creación de emprego e o apoio ao emprendemento local.
O programa está financiado a través do Fondo Europeo Marítimo, de Pesca e de Acuicultura (FEMPA), co propósito de impulsar proxectos que poñan en valor os recursos pesqueiros e favorezan o desenvolvemento económico do territorio.