O rexeitamento nacionalista ás contas abre unha nova fronte política en Miño
O BNG de Miño votou en contra da aprobación inicial do orzamento municipal para 2026, nun pleno no que os nacionalistas criticaron a falta de diálogo do Goberno local do PSOE durante a elaboración das contas. O concelleiro Alberte G. Nicolás cualificou o documento económico de 'continuista' e asegurou que foi feito 'de costas á oposición e á veciñanza'.
O portavoz nacionalista lembrou que o seu grupo rexistrou en decembro de 2025 un documento con propostas para incorporar ao orzamento, cunha vontade, segundo indicou, de chegar a acordos e contribuír á mellora do municipio. Porén, denunciou que desde entón non houbo resposta por parte do Executivo municipal, nin chamadas, nin reunións, nin unha negociación sobre as achegas presentadas.
Desde o BNG consideran que o Goberno local incumpriu o compromiso adquirido no anterior debate orzamentario, cando, segundo apuntan, se comprometera a avaliar as propostas dos diferentes grupos municipais. Para os nacionalistas, esta falta de interlocución demostra que o discurso de colaboración do PSOE quedou nunha declaración sen efectos prácticos.
A formación tamén critica que as contas non incorporen mecanismos reais de participación cidadá. O BNG lembra que no pleno de febreiro xa quedara patente, ao seu xuízo, a negativa do Goberno municipal a impulsar fórmulas como os orzamentos participativos ou espazos estables para contar coa veciñanza nas principais decisións do Concello.
Entre as medidas que o grupo nacionalista propoñía figuraban o reforzo das partidas de emerxencia social e prevención da exclusión, a mellora da seguridade viaria mediante o repintado da sinalización horizontal e actuacións de calmado do tráfico, así como a instalación de pictogramas en espazos públicos para facilitar a inclusión de persoas con TEA.
O BNG tamén defendía a posta en marcha dun plan integral de mantemento de beirarrúas, camiños e sumidoiros en todas as parroquias. Segundo Alberte G. Nicolás, trátase de medidas básicas para atender problemas reais do día a día e mellorar a calidade de vida da veciñanza.
Os nacionalistas sosteñen que o seu apoio ao orzamento dependía da existencia dun diálogo previo, mais consideran que o Goberno local optou pola 'autocompracencia' e pola falta de consenso. Tamén reprochan ao alcalde, Manuel Vázquez Faraldo, que no debate plenario adoptase un ton de confrontación en lugar de explicar por que non se respondera ás propostas presentadas meses atrás.
A aprobación inicial das contas, que ascenden a 10.624.272 euros e supoñen o orzamento máis alto da historia de Miño, queda así marcada tamén pola crítica da oposición nacionalista. O BNG asegura que continuará presentando propostas 'útiles e construtivas' para o municipio e insiste en que Miño precisa unhas contas máis participativas, sociais e pegadas ás necesidades das parroquias.