O Quantum Lab do CITIC sitúa a UDC na carreira da computación cuántica aplicada
A Universidade da Coruña puxo en marcha o Quantum Lab do CITIC, un novo espazo científico e interdisciplinar chamado a converterse nun polo de referencia en computación cuántica aplicada en Galicia. A infraestrutura foi presentada na Reitoría da UDC polo reitor, Ricardo Cao, acompañado polo investigador Diego Andrade, un dos impulsores do proxecto, polo director do CITIC, Manuel G. Penedo, e polo vicerreitor de Investigación e Transferencia, Jerónimo Puertas.
O laboratorio nace co obxectivo de integrar a computación clásica coas tecnoloxías cuánticas emerxentes para abordar problemas de gran complexidade algorítmica que quedan fóra do alcance da informática convencional. A súa posta en marcha conta cun investimento estratéxico de 1,04 millóns de euros do Ministerio de Ciencia, Innovación e Universidades e da Axencia Estatal de Investigación, cofinanciado pola Unión Europea.
Ricardo Cao destacou que o Quantum Lab será unha infraestrutura clave para reforzar a investigación, a innovación e a transferencia tecnolóxica en Galicia. Pola súa banda, Diego Andrade explicou que o proxecto busca crear sinerxías entre grupos de investigación, captar novo financiamento e aumentar a capacidade científica neste ámbito, con especial atención á aplicación práctica dos resultados nas empresas da contorna.
O novo espazo traballará en liñas como o 'Quantum Machine Learning', a intelixencia artificial cuántica, o estudo comparativo de arquitecturas cuánticas, a saúde dixital, a ciberseguridade, a transición enerxética e as finanzas. No ámbito biomédico, desenvolveranse algoritmos para analizar rexistros médicos, mentres que no financeiro se investigarán solucións para optimizar carteiras e modelizar riscos en escenarios complexos.
O Quantum Lab CITIC contará cun sistema físico SpinQ de tres qubits baseado en resonancia magnética nuclear, pensado para experimentación, docencia avanzada e validación de algoritmos. Tamén incorporará un emulador cuántico desenvolvido no propio CITIC, sistemas de computación de altas prestacións e equipamento en comunicacións cuánticas e criptografía.
A infraestrutura concíbese ademais como un espazo aberto á comunidade investigadora, aos centros tecnolóxicos e ás empresas. O obxectivo é facilitar probas de concepto, proxectos piloto, avaliación de algoritmos e servizos de auditoría tecnolóxica antes da adopción industrial das tecnoloxías cuánticas.
O proxecto apoiarase tamén na Cátedra ITG-UDC en Tecnoloxía Cuántica e na colaboración con redes como o Centro de Supercomputación de Galicia, a Rede de Tecnoloxías Cuánticas de Galicia e plataformas europeas especializadas. O equipo estará formado por investigadores do CITIC e da UDC con perfís en computación cuántica, intelixencia artificial, matemáticas aplicadas e supercomputación.