Política | Actualidade

Os socialistas consideran que a publicación encobre propaganda política de Alternativa dos Veciños e cuestionan que se destinen máis recursos á imaxe do Goberno local que a servizos como a desratización

O Grupo Municipal Socialista de Oleiros criticou o contrato licitado polo Concello para imprimir unha publicación presentada como un libro informativo, cun orzamento de 65.454,48 euros e unha tiraxe prevista de 18.000 exemplares a toda cor. A formación considera que esta iniciativa responde a unha estratexia de promoción política de Alternativa dos Veciños, financiada con fondos públicos.

Os socialistas cuestionan tanto o custo da contratación como a finalidade da publicación, que consideran allea a unha labor informativa neutral. "Non é información para os veciños, é unha campaña de mercadotecnia para tapar os fallos de xestión de Alternativa pagada por todos", sinalan desde o grupo municipal.

A formación tamén expresa a súa preocupación polo momento no que se tramita o expediente, ao considerar que se produce nun contexto preelectoral. Ao seu xuízo, o uso de recursos municipais para este tipo de iniciativas compromete a necesaria neutralidade institucional.

Gastos en comunicación

O PSOE de Oleiros enmarca esta contratación nunha política de comunicación municipal que, segundo denuncia, inclúe outros gastos recorrentes. Entre eles cita a publicación Vivir en Oleiros, a contratación de espazos radiofónicos en emisoras privadas, a compra de publicidade en prensa e as accións de posicionamento nas redes sociais.

Os socialistas tamén cuestionan a presenza do alcalde na emisora pública Radio Oleiros e lembran a emisión dunha entrevista que cualifican de guionizada e lida. Segundo a súa versión, aquela intervención buscaba xustificar, mediante supostos problemas de saúde, as declaracións e ameazas do rexedor dirixidas a unha axente da Policía.

O grupo municipal considera que estes recursos deberían destinarse a atender as necesidades da veciñanza, en lugar de reforzar a imaxe do Goberno local. Para ilustrar esta crítica, compara o importe do contrato de impresión co orzamento anual que, segundo asegura, dedica o Concello á desratización de todo o municipio.

"É indignante que se gasten outros máis de 65.000 euros en propaganda partidista mentres o Concello apenas destina 9.000 euros anuais para desratizar todo Oleiros", denuncian os socialistas. A formación considera que esa cantidade resulta insuficiente e advirte de que a situación está a provocar problemas de salubridade.

Ante esta situación, o PSOE reclama que se poña fin a unhas prácticas que considera incompatibles coa neutralidade que debe rexer a actuación das administracións públicas. Ademais, pide que os cartos procedentes dos impostos da cidadanía se empreguen para reforzar os servizos públicos esenciais e mellorar o benestar da veciñanza, en lugar de financiar o que cualifica como unha campaña de mercadotecnia política de Alternativa dos Veciños.