O PSOE de Oleiros alerta do risco na AC-173 ao seu paso por Arillo e pide revisar de inmediato as obras da estrada
O grupo municipal do PSOE de Oleiros reclamou ao Concello e á Xunta de Galicia unha inspección técnica inmediata das obras de reasfaltado que se están executando na estrada autonómica AC-173, que conecta Santa Cruz e Mera. Os socialistas centran especialmente as súas críticas no tramo situado no núcleo de Arillo, onde aseguran ter detectado deficiencias que poderían afectar á seguridade viaria.
Segundo denuncia a formación, os traballos non estarían executándose conforme ás actuacións previstas no proxecto. Entre elas figuraría o fresado previo das zonas deterioradas, así como a limpeza e adecuación das cunetas para garantir unha correcta evacuación das augas pluviais.
O PSOE sinala que, en lugar de retirar parte do firme existente nas zonas que o precisaban, a actuación estaría consistindo principalmente na colocación de novas capas de aglomerado asfáltico sobre a calzada antiga. Esta actuación estaría provocando, segundo os socialistas, unha elevación da cota da estrada.
Advertencia polo estado do tramo de Arillo
A formación considera especialmente preocupante a situación no núcleo de Arillo. Segundo explica, o incremento da altura do pavimento tería reducido a diferenza existente entre a calzada e os bordos, diminuíndo a súa capacidade para actuar como elemento de protección e separación.
Os socialistas advirten de que esta circunstancia podería incrementar o risco no caso de que un vehículo se saia da vía. Ao quedar o bordo practicamente á mesma altura que o novo firme, consideran que perdería parte da súa función como elemento de retención e guía, facilitando que un vehículo poida invadir a zona peonil en caso de despiste ou saída da calzada.
Outro dos problemas sinalados polo PSOE está relacionado coa evacuación da auga. A formación teme que a modificación das cotas da estrada e a falta de adecuación das cunetas poidan dificultar o drenaxe durante episodios de choiva intensa e favorecer a chegada de auga ás beirarrúas e aos inmobles próximos.
Desde o grupo socialista cualifican a situación de 'temeridade técnica' e consideran que unha actuación destinada a mellorar a estrada non debería acabar xerando novos riscos para condutores e peóns.
Por este motivo, o PSOE de Oleiros reclama ao Goberno local que solicite formalmente á Consellería de Infraestruturas a revisión dos puntos máis problemáticos da AC-173 e a corrección das posibles deficiencias antes de que as obras rematen.
A formación asegura que a súa prioridade é que os traballos executados na estrada garantan unhas condicións adecuadas de seguridade viaria e de drenaxe para os vehículos, os peóns e as vivendas situadas nas proximidades da vía.