O PSdeG de Arteixo denuncia irregularidades no curso de socorrismo acuático do Concello
Redacción ACoruñaXaO grupo municipal socialista de Arteixo informa de que preguntará ao goberno local no pleno de abril polo curso de socorrismo en instalacións acuáticas e espazos naturais programado para dar a formación necesaria a aqueles que desexen exercer de socorristas nos areais do Concello.
“Unha boa iniciativa” afirma a voceira socialista, Ana Cedeira, “tendo en conta as dificultades dos últimos anos para atopar socorristas coa formación necesaria marcada polos novos decretos da Xunta de Galicia”, aínda que afirma que o seu grupo ten dúbidas sobre certas irregularidades na estrutura do curso, o cambio dos horarios e se realmente cumpre os requisitos para habilitar a inscrición no Rexistro Profesional de Socorristas de Galicia.
Segundo indican os socialistas arteixáns fíxose un cambio unilateral dos horarios do curso por parte da empresa contratada que impediu a algún dos admitidos puidese realizalo a pesar de ter praza.
Doutra banda, o grupo socialista sinala que se descoñece o sistema de contratación da empresa formadora así coma o contido das probas de selección ou os requisitos de aptitude mínimos necesarios para acceder ao curso e que convalidarían parte do seu contido.
Por todo isto, Cedeira comunica que o grupo socialista pedirá ao equipo de goberno as aclaración necesarias “ante as posibles irregularidades detectadas”.