O PP de Sada cuestiona a falta de permisos en proxectos que optan ás axudas da Deputación
O PP de Sada reclama ao goberno municipal que asegure os permisos e a dispoñibilidade dos terreos antes de presentar proxectos ás convocatorias de axudas da Deputación da Coruña. Os populares consideran que a falta de planificación e coordinación entre administracións pode poñer en risco actuacións necesarias para o municipio.
Como exemplo, sinalan o proxecto para renovar a rede de abastecemento de auga en Pazos-Fontán, cun orzamento superior aos 630.000 euros, que chegou ao último pleno municipal no último momento. A intervención prevé traballos baixo a estrada provincial DP-7506, pero, segundo o PP, a documentación do expediente apunta á necesidade dunha autorización administrativa ou dunha cesión por parte da administración titular da vía.
Esta circunstancia levou os populares a absterse na votación. A formación asegura que non pretende bloquear unha mellora para a veciñanza, senón advertir de que a actuación se tramitou sen ter garantida a dispoñibilidade da estrada afectada.
'A prudencia non significa bloqueo. Significa evitar que se aproben proxectos no último momento, sen as autorizacións necesarias e sen garantías suficientes de que se poidan executar', sinalou a portavoz do PP local, Esperanza Arias.
Os populares piden que, antes de solicitar ou comprometer fondos públicos, se resolvan as autorizacións e cesións necesarias para evitar que as obras acaben paralizadas, sufran atrasos ou non poidan levarse a cabo.
Outras actuacións pendentes
O PP tamén lembra que seguen pendentes varios asuntos que, ao seu xuízo, dificultan o avance de proxectos de interese municipal. Entre eles, sitúa a posta a disposición do Concello de dous treitos de estradas provinciais, a DP-0812, entre Sada e Espiñeira Santo, e a DP-0813, entre Sada e Armuño, necesarios para acometer a apertura do río Maior.
A formación cita tamén a subvención para reparar a capela de San Roque e o investimento previsto para humanizar a estrada de Riovao.
Arias reclama máis cooperación técnica e coordinación entre administracións para desbloquear estas actuacións e advirte de que tanto a xestión municipal como a lentitude da Administración provincial poden comprometer o desenvolvemento de proxectos relevantes para Sada.