O PP de Culleredo denunia "unha parálise" no Concello por mor do Goberno municipal
A portavoz do Grupo Popular en Culleredo, Izaskun García, mostrou o seu enfado polo “absoluto deixamento do señor Rioboo e os seus concelleiros. Teñen a pouca vergoña de presentar unha convocatoria de pleno ordinario completamente baleira de contido”.
“Seguimos sen orzamentos para este ano, sen PXOM, sen pregos de contratación para a limpeza viaria e de edificios, co parque das Brañas sen solucionar, con obras tan importantes como as de Fonte dá Balsa sen empezar… e un longo etcétera que terían ocupadísimo a calquera alcalde. A calquera menos ao noso. O seu deixamento é abochornante”.
Os populares cuestionan a capacidade de xestión e de liderado do alcalde, “que non só non pisa o Concello, senón que tampouco sabe como poñer a traballar ao seu equipo”.
Os concelleiros populares sinalan tamén que esta parálise da actividade do goberno
municipal nótase “con especial gravidade nas comisións informativas, ás que non asiste o alcalde e onde os concelleiros socialistas acoden sen preparación algunha dos asuntos para tratar, sendo incluso os concelleiros da oposición os que temos que aclararlles certos temas. É algo insólito!”.
Desde o Grupo Municipal Popular quéixanse tamén de que “ademais de non realizar o seu traballo, poñen continuas trabas ao noso. Incumpren sistematicamente os prazos para poñer ao dispor os expedientes que se lles solicita, envíannos a documentación dos plenos coa mínima antelación posible e mesmo fóra de prazo, escusándose continuamente en fallos informáticos”.