O PP de Betanzos pedirá información no pleno sobre dúas obras municipais
O grupo municipal popular de Betanzos informou de que levará ao pleno deste mes de marzo unha moción na que insta o goberno local a explicar, cal é a situación na que se atopan os proxectos do elevador do aparcamento público da praza Irmáns García Naveira, así como o abastecemento e saneamento dos soportais de Fonte de Unta.
A súa portavoz Cecilia Vázquez indicou que “esixirá ao equipo de goberno un cronograma no que se reflictan as datas de inicio das citadas actuacións ” que foron anunciadas fai 5 anos.
Para Vázquez, son obras urxentes e necesarias, sobre as que o goberno municipal leva cinco anos anunciando a súa “inminente execución” sen que esas reiteradas declaracións tivesen efecto práctico algún. Así, desde o Partido Popular vén trasladando periodicamente ao Concello o malestar dos veciños, ante o reiterado incumprimento das actuacións prometidas polo goberno local.