O pleno de maiores de Betanzos reclama unha residencia pública e máis parques biosaludables
As persoas maiores de Betanzos tomaron este mércores a palabra nun 'pleno' especial no que presentaron propostas para mellorar a súa calidade de vida e a da cidade.
Na sesión participaron 17 homes e mulleres en representación dos talleres municipais de memoria, das actividades de Cruz Roja, do espazo +60 de Afundación e da asociación de xubilados e pensionistas.
Cada grupo funcionou como se fose unha formación política e levou ao pleno mocións, rogos e preguntas. En total, presentáronse oito propostas, todas aprobadas por maioría absoluta.
Entre as peticións máis destacadas estivo a creación dunha residencia pública de maiores en Betanzos. Tamén se propuxo poñer en marcha un programa contra a soidade non desexada, especialmente dirixido ás persoas de máis idade.
Outro dos asuntos tratados foi a mellora da piscina municipal, coa petición de renovar as instalacións e implicar tamén a outras administracións públicas. Ademais, reclamouse ampliar a oferta de actividades municipais, con máis prazas e cun baile mensual.
As persoas participantes tamén defenderon a creación dunha feira comarcal ou provincial pensada para os maiores. A idea é que inclúa exposicións, charlas sobre alimentación saudable, actividades culturais, propostas de ocio, gastronomía e iniciativas sobre seguridade, tecnoloxía e benestar.
A limpeza viaria, o coidado do cemiterio, os parques e xardíns e a creación de máis parques biosaludables foron outras das demandas aprobadas durante a sesión.
O pleno tamén serviu para poñer sobre a mesa a necesidade de axudas económicas para persoas con pensións baixas e para familias con menores a cargo.
A actividade formou parte do programa 'Betanzos Acompáñate', dirixido a persoas maiores de 65 anos. Esta iniciativa busca detectar situacións de soidade non desexada, crear redes de apoio e favorecer a participación das persoas maiores na vida social do municipio.