O Consorcio As Mariñas pedirá unha reunión urxente con Inés Rey tras a xuntanza sobre a área metropolitana
O presidente do Consorcio As Mariñas, José Antonio Santiso, solicitará unha reunión urxente coa alcaldesa da Coruña, Inés Rey, despois da xuntanza celebrada este venres para abordar o futuro da área metropolitana sen contar coa maioría dos concellos que integran a entidade supramunicipal.
A petición prodúcese tras o malestar expresado por varios alcaldes e alcaldesas que quedaron fóra do encontro. Santiso asegura que, aínda que respecta a capacidade do Concello da Coruña para convocar as reunións que considere oportunas, non entende que se pretenda avanzar na creación dunha área metropolitana deixando á marxe municipios cos que se leva anos traballando precisamente nesta materia e cos que existen servizos compartidos e proxectos de cooperación en marcha.
O presidente do Consorcio considera lóxico convocar aos concellos da primeira coroa metropolitana para tratar cuestións concretas como a EDAR de Bens ou o transporte urbano, pero lembra que o propio Concello da Coruña explicou que a reunión tiña como finalidade abordar aspectos máis amplos relacionados coa futura área metropolitana, incluíndo cuestións de gobernanza, servizos e infraestruturas supramunicipais, ademais da creación dun grupo de traballo específico.
Santiso destacou que o Consorcio As Mariñas mantivo historicamente unha actitude de colaboración institucional co Concello da Coruña, tanto co actual goberno municipal como cos anteriores. Segundo sinalou, os alcaldes e alcaldesas da entidade participaron regularmente nas reunións convocadas pola cidade, colaboraron no desenvolvemento de proxectos conxuntos e traballaron para fortalecer a cooperación entre a Coruña e a súa contorna.
Por este motivo, considera que a decisión adoptada agora polo Concello coruñés supón unha actuación unilateral que pode deteriorar as relacións institucionais construídas durante anos.
O presidente tamén puxo en valor a colaboración mantida polos municipios do Consorcio en cuestións de especial relevancia, como o tratamento dos residuos. Neste ámbito lembrou que, malia as dúbidas existentes sobre o futuro da planta de Nostián e a falta de información sobre o modelo de xestión futuro, os concellos continuaron apoiando este proxecto por entendelo como unha iniciativa compartida entre a cidade e a súa área de influencia.
Ante a situación xerada, Santiso considera necesario aclarar canto antes a posición do Concello da Coruña para coñecer se existe vontade de seguir avanzando mediante o consenso ou se se produciu un cambio na relación institucional mantida ata o momento.
O presidente do Consorcio amósase disposto a reconducir a situación, pero insiste en que calquera proceso relacionado coa área metropolitana debe contar coa participación de todos os concellos integrantes da entidade. Ao seu xuízo, unha área metropolitana só pode funcionar se nace do acordo, da igualdade institucional e dunha visión compartida do territorio.
O Consorcio tamén destacou a postura adoptada polo Concello de Culleredo. A pesar de estar convidado á reunión, o seu alcalde decidiu non asistir ao considerar que non era adecuado abordar o futuro da área metropolitana sen contar con boa parte dos municipios afectados. A entidade interpreta esta decisión como un xesto de coherencia e solidariedade institucional en defensa dun modelo baseado na participación e no respecto entre administracións.
José Antonio Santiso concluíu reiterando que o principal obxectivo do Consorcio As Mariñas e dos alcaldes e alcaldesas que o integran segue a ser a defensa dos intereses da cidadanía e a prestación de servizos públicos de calidade.