Concello | Sucesos

A CIG concentrouse este luns diante da Casa do Concello e a oposición levou a un pleno extraordinario a política de persoal, mentres o executivo de Carlos Calvelo xustificou tres despedimentos e varias sancións disciplinarias pola gravidade dos feitos

Imaxe de Noelia Uceira

A política de persoal do Concello de Arteixo converteuse este luns, 13 de abril, nun dos principais focos de tensión municipal. A mañá estivo marcada pola concentración convocada pola CIG diante da Casa Consistorial e pola celebración dun pleno extraordinario impulsado pola oposición para abordar a xestión laboral do goberno local. O sindicato denunciou un clima de 'medo, represión e arbitrariedade', mentres o PSOE xa viña advertindo nos últimos días de opacidade, conflitos laborais e tensión crecente en varios servizos municipais.

Na súa resposta, o alcalde, Carlos Calvelo, defendeu que o Concello se viu obrigado nos últimos anos a adoptar medidas disciplinarias e a executar tres despedimentos por faltas graves no traballo. Segundo sostivo o rexedor, todas estas decisións se tomaron a partir de informes dos responsables dos distintos servizos e, no caso dos procesos xa xudicializados, contan ata o de agora co aval dos tribunais.

O executivo local puxo especial énfase no caso máis recente, o dun condutor do servizo de residuos. Segundo explicou Calvelo, o despedimento produciuse tras detectarse unha suposta manipulación do sistema de seguridade do camión de recollida, unha actuación que, sempre segundo a versión municipal, podía comprometer tanto a integridade das persoas como o estado do vehículo. O goberno engadiu ademais que o traballador incumprira de maneira reiterada tarefas asociadas ao servizo e desoíra indicacións dos seus superiores.

O alcalde tamén repasou outros dous despedimentos. Un deles afectou a un operario de limpeza viaria e, segundo relatou, estivo motivado por unha agresión verbal e física contra un capataz cun arma cortante. O outro corresponde a un traballador do servizo de augas ao que o goberno atribúe repetidas negativas a realizar tarefas encomendadas, ademais doutros incumprimentos ao longo de 2024 e 2025. Xunto a estes casos, o Concello defendeu outro expediente disciplinario con suspensión de emprego e soldo a un condutor do servizo de residuos por unha presunta agresión física e verbal a un compañeiro.

Fronte a esta versión, a CIG sostén que o despedimento máis recente no servizo de residuos é 'desproporcionado e carente de fundamento real' e enmárcao nunha estratexia para amedrentar o persoal municipal e frear a contestación sindical. O sindicato alertou tamén dun deterioro do clima laboral e vinculou este conflito cun proceso máis amplo de deterioración e privatización de servizos públicos.

Na mesma liña crítica, os socialistas de Arteixo defenderon que o pleno extraordinario debía servir para esixir explicacións sobre a xestión de persoal, tanto polos despedimentos e sancións como pola situación de SUMARTE, os procesos selectivos e a externalización dalgúns servizos. O choque deixa así aberto un novo frente político e laboral no Concello, cun goberno que reivindica a súa obriga de actuar ante incumprimentos graves e cunha oposición e unha central sindical que denuncian unha deriva autoritaria na xestión interna.