Actualidade

A proposta para destinar 265.000 euros ao inicio do proceso de expropiación dos terreos lindeiros non foi aprobada debido á oposición de UxS, PP e PSOE

O goberno local de Sada manifestou o seu compromiso firme para avanzar na ampliación do CEIP Sada e Contornos, unha demanda histórica da comunidade educativa que busca mellorar as condicións deste centro escolar. A pesar deste obxectivo común, a proposta presentada no pleno ordinario para aprobar unha modificación de crédito necesaria para iniciar o proceso de expropiación dos terreos lindeiros non contou co respaldo necesario, debido ós votos en contra de UxS, PP e PSOE.

A modificación de crédito, que ascendía a 265.000 euros, tiña como finalidade habilitar os recursos necesarios para comezar co expediente de expropiación antes de que remate o exercicio económico. Segundo indicou o goberno local, a aprobación desta medida no pleno permitiría adiantar os trámites administrativos e acelerar a ampliación dun centro educativo que leva anos agardando esta mellora.

Críticas á oposición por paralizar os avances

Desde o goberno local, lamentan profundamente a actitude de UxS, PP e PSOE, acusándoos de antepoñer intereses partidarios ao benestar da veciñanza de Sada. “Unha vez máis, obsérvase como as prioridades políticas da oposición pasan por enriba dunha urxencia evidente para a nosa comunidade educativa,” sinalaron fontes do executivo local.

A ampliación do CEIP Sada e Contornos é unha cuestión recorrente nas solicitudes da comunidade educativa, que leva tempo demandando máis espazo e mellores infraestruturas para o alumnado. A negativa de aprobar a urxencia implicará un atraso significativo no inicio dos trámites e, consecuentemente, no desenvolvemento do proxecto de ampliación.

Un compromiso mantido a longo prazo

Malia os atrancos, o goberno local reafirma o seu compromiso de traballar para levar a cabo esta ampliación e buscará outras vías para garantir que o proxecto se poida executar sen maiores demoras. “Seguiremos insistindo porque este é un tema de xustiza e de necesidade para a veciñanza de Sada. Non imos permitir que intereses partidistas bloqueen un proxecto clave para a nosa comunidade,” aseguraron.

O goberno conclúe facendo un chamamento á reflexión dos grupos políticos que se opuxeron á medida, lembrando que as iniciativas para mellorar a educación e o benestar da infancia deben estar por riba de calquera diferenza política.