O Concello de Ordes estuda cambios nos vaos e pide a opinión da veciñanza
O Concello de Ordes puxo en marcha unha consulta cidadá para coñecer a opinión da veciñanza sobre os vaos municipais e recoller propostas que permitan adaptar este servizo ás necesidades actuais dos propietarios de garaxes e accesos privados.
A través dun formulario habilitado en internet, as persoas interesadas poden trasladar a súa preferencia entre tres modalidades diferentes: vao diúrno, vao nocturno ou vao permanente. O obxectivo é obter unha visión máis ampla sobre cales son as opcións máis demandadas antes de estudar posibles medidas relacionadas coa regulación deste servizo.
Desde o Concello explican que a iniciativa ten carácter exclusivamente consultivo, polo que os resultados non serán vinculantes. Con todo, a información recompilada servirá para coñecer mellor as necesidades da cidadanía e valorar futuras actuacións nesta materia.
Os vaos municipais permiten reservar o acceso a garaxes e entradas de vehículos, regulando o estacionamento diante destes espazos para facilitar a entrada e saída dos usuarios. Dependendo da modalidade escollida, a restrición pode aplicarse durante determinadas franxas horarias ou durante as 24 horas do día.
A consulta está aberta a toda a veciñanza interesada, especialmente ás persoas titulares ou usuarias de garaxes e accesos privados que se vexan afectadas por este tipo de autorizacións. O formulario pode cubrirse de maneira telemática a través da ligazón publicada polo Concello.
Con esta iniciativa, o goberno local busca fomentar a participación cidadá na toma de decisións relacionadas coa mobilidade e a ordenación do espazo público, permitindo que os veciños e veciñas poidan expresar a súa opinión sobre unha cuestión que afecta ao seu día a día.