O Concello de Culleredo defende que quere un novo convenio co Centro Social Ledoñés e nega a falta de colaboración

ACoruñaXa
O Goberno local asegura que xa remitiu unha proposta de acordo á asociación e que está disposto a contribuír á mellora dunhas instalacións privadas
Casa do Concello de Culleredo
19 Nov 2026

O Concello de Culleredo reafirmou a súa disposición a asinar un novo convenio de colaboración co Centro Social Ledoñés, despois das críticas formuladas pola asociación pola falta de apoio municipal e pola ausencia dun acordo que permita afrontar o mantemento das instalacións. O Goberno local asegura que leva meses traballando nunha proposta de texto para regular a colaboración e que o documento está pendente de ser concretado entre ambas as partes.

Segundo explica o Concello, nos últimos meses mantivéronse varias reunións con representantes da entidade para buscar unha fórmula que permita á Administración intervir nunhas dependencias de titularidade privada. O Executivo municipal afirma que está disposto a contribuír á súa mellora, pero insiste en que é necesario contar cun respaldo legal que permita realizar investimentos nun edificio que non é de titularidade pública.

O colexio electoral trasladarase ao CRA de Ledoño

Outro dos puntos de desacordo é a utilización do centro como colexio electoral nas eleccións do vindeiro 29 de novembro. O Concello confirma que as votacións xa non se celebrarán nestas instalacións e que foi necesario buscar unha localización alternativa, que será o CRA de Ledoño.

A Administración local atribúe o cambio á negativa da asociación a ceder o espazo, unha decisión que, segundo indica, foi comunicada por escrito e presentada por rexistro o pasado 16 de outubro. O Goberno local lamenta o que considera unha decisión unilateral e asegura que actuou con rapidez para garantir que os veciños poidan votar nun lugar próximo.

O Concello asegura que a asociación non solicitou as axudas

En relación co financiamento, o Goberno municipal sostén que as subvencións destinadas ás asociacións se conceden mediante un procedemento de concorrencia competitiva, seguindo os criterios establecidos pola Intervención municipal. Segundo a súa versión, o Centro Social Ledoñés non se presentou á convocatoria pública, da que si resultaron beneficiarias outras entidades das distintas parroquias.

O Concello tamén rexeita que non exista colaboración coa asociación e cita como exemplos o apoio ás actividades de Nadal, Entroido e o pasado Magosto, no que asegura que prestou as grellas. Sobre a petición de mesas e cadeiras para esta última celebración, sinala que non dispón deste material en propiedade.

O Goberno local cuestiona, ademais, as declaracións realizadas pola asociación e afirma que conteñen datos que non se corresponden coa realidade. A pesar do enfrontamento, insiste en que mantén aberta a posibilidade de chegar a un acordo para apoiar as actividades que beneficien a parroquia, sempre dentro dos procedementos administrativos e legais.

0.15312600135803