Concello | Sindicatos

O sindicato denuncia que a mesa foi levantada tras un atraso de 13 minutos, mentres que o Concello asegura que a sesión se desenvolveu “con absoluta normalidade”

O Concello de Culleredo responde ás queixas da CIG relativas á reunión da Mesa de Negociación celebrada o pasado xoves, na que se abordou un único punto da orde do día vinculado á interpretación de determinados permisos no convenio colectivo municipal.

Segundo explica a administración local, a sesión desenvolveuse “con absoluta normalidade, respecto e vontade de facilitar a participación de todas as organizacións sindicais”. A convocatoria estaba fixada para as 10:30 horas e, antes do seu inicio, informouse de forma non oficial a través doutra organización sindical de que unha das representantes chegaría con uns dez minutos de atraso. Ante esta circunstancia, a Presidencia decidiu agardar ese tempo de cortesía, aínda que sinala que esa comunicación non foi trasladada formalmente.

O asunto tratado na Mesa consistía en dar conta da apreciación realizada polo Consello Galego de Relacións Laborais sobre o acordo plenario de aprobación do convenio colectivo do Concello de Culleredo, centrada na interpretación do cómputo de certos permisos. O goberno local lembra ademais que o convenio foi aprobado por unanimidade, co respaldo de todas as organizacións sindicais, incluída a CIG.

Transcorrido o tempo inicialmente comunicado sen que se producise a incorporación da representante sindical, a Presidencia abriu a quenda de intervencións, sen que ningunha organización considerase necesario intervir ao entender aclarado o punto. A continuación, procedeuse á votación, que contou con respaldo unánime.

O Concello engade que, unha vez finalizada a sesión e mentres se redactaba a acta, se incorporou a representante sindical que comunicara o seu atraso, manifestando o seu malestar por non poder participar. Segundo a versión municipal, explicáronselle os motivos do ocorrido, insistindo en que se respectara o tempo de cortesía e que a reunión se desenvolvera con transparencia e normalidade institucional.

Así mesmo, o goberno local afirma que se ofreceron posteriormente as aclaracións oportunas sobre o contido tratado, o criterio do Consello Galego de Relacións Laborais e o resultado da votación, subliñando que o obxectivo da convocatoria era unicamente trasladar ese matiz técnico para continuar coa tramitación do convenio.

En definitiva, o Concello defende que a Mesa de Negociación se axustou aos procedementos habituais e se desenvolveu con vontade de axilidade administrativa e respecto pola participación sindical.