O Concello de Arteixo investirá medio millón de euros para renovar a rede de saneamento de Santa Leocadia
O Concello de Arteixo, a través da empresa pública Sumarte, impulsará unha actuación de mellora da rede de saneamento no lugar de Santa Leocadia, na parroquia de Loureda, cun investimento de medio millón de euros. O proxecto, recibido recentemente pola administración local, busca responder a unha demanda histórica da veciñanza e reforzar tanto os servizos públicos como a protección da contorna natural.
A intervención permitirá optimizar a recollida e condución das augas residuais procedentes de distintos puntos da aldea, unificando varios efluentes urbanos que na actualidade presentan unha xestión dispersa. O obxectivo é que todas esas augas sexan canalizadas a través dun novo sistema de colectores ata un único punto de conexión coa rede municipal existente, favorecendo unha xestión máis eficiente, segura e sostible.
Para levar a cabo esta actuación instalaranse aproximadamente 2.500 metros lineais de novos colectores de augas residuais, ampliando e modernizando a infraestrutura de saneamento nunha zona marcada pola dispersión das vivendas e pola complexidade da súa orografía.
Santa Leocadia está situada nunha das áreas máis elevadas do municipio de Arteixo. Na parroquia de Loureda, a contorna alcanza cotas próximas aos 384 metros de altitude, mentres que o núcleo de poboación se sitúa arredor dos 329 metros. As vivendas distribúense ao longo dunha estrada local en forma de anel e atópanse nun espazo rural con importantes condicionantes topográficos para a execución de infraestruturas hidráulicas.
Ademais, a estrada provincial DP-0511 localízase a uns tres quilómetros de distancia e os núcleos habitados máis próximos están situados a máis dun quilómetro e en cotas inferiores, factores que incrementan a dificultade técnica da obra.
Desde o Concello sinalan que este investimento forma parte da estratexia municipal para continuar ampliando e mellorando as redes de abastecemento e saneamento nas distintas parroquias, prestando especial atención aos núcleos rurais que, polas súas características xeográficas, precisan solucións específicas para garantir servizos públicos de calidade.
Coa execución deste proxecto espérase incrementar a eficiencia da rede, reducir o risco de verteduras incontroladas e reforzar a protección dos recursos naturais e dos cursos fluviais da contorna. Ao mesmo tempo, a actuación contribuirá a mellorar as condicións sanitarias e ambientais da zona, dotando á veciñanza dunha infraestrutura preparada para responder ás necesidades actuais e futuras.
O goberno municipal destaca que a mellora dos servizos básicos continúa a ser unha das súas prioridades e subliña que a creación da empresa pública Sumarte está a facilitar a execución de actuacións estratéxicas que benefician directamente á cidadanía, favorecen o equilibrio territorial e achegan investimentos tamén aos núcleos rurais, contribuíndo á fixación de poboación e á mellora da calidade de vida.