O Concello da Coruña renova o convenio de colaboración co Banco de Alimentos Rías Altas
O Concello da Coruña e o Banco de Alimentos Rías Altas (BALRIAL) renovan un ano máis o seu convenio de colaboración. Así, a alcaldesa da Coruña, Inés Rey, asinou esta semana co presidente do Banco de Alimentos, Manuel Mora, o convenio nominativo polo que se renova o apoio do Concello ao financiamento de gastos da entidade. O importe do convenio é de 50.000 euros para este ano 2024.
Durante o acto, a alcaldesa subliñou que a colaboración entre o Concello e BALRIAL remóntase ao ano 2013. “Son máis de 10 anos de apoio a unha entidade que realiza un labor imprescindible e que é un exemplo máis da coordinación e fluidez das relacións entre o Concello e as entidades sociais, o que nos permite chegar a máis persoas e con maior eficacia”, sinalou Inés Rey.
Pola súa banda, o presidente do Banco de Alimentos Rías Altas agradeceu á alcaldesa o "respaldo ao labor que realiza a entidade tanto á través do convenio como en campañas como a realizada o pasado mes de decembro, na que se colocaron caixas de recollida de alimentos destinados a Balrial nos centros cívicos".
Neste ano 2024, o Concello desde a súa Área de Benestar Social mantén convenios nominativos por un importe de máis de tres millóns de euros con entidades que traballan pola inclusión, a loita contra as adiccións, os maiores, a infancia, a discapacidade e a defensa dos dereitos e o benestar de persoas enfermas e o seu familiares.
O Banco de Alimentos Rías Altas é unha organización sen ánimo de lucro que naceu en 2010 da iniciativa dun grupo de profesionais xubilados e cuxo fin é recoller alimentos para facelos chegar a colectivos vulnerables a través de distintas entidades sociais. A entidade recibe doazóns de particulares, empresas e centros educativos; xestiona alimentos procedentes de organismos da UE e organiza campañas de recollida, mercadillos, galas benéficas e outros eventos entre os que destaca a Gran Recollida que se realiza ao redor das datas do Nadal.