O Concello da Coruña destina 500.000 euros ás entidades veciñais para financiar as festas de barrio
O Concello da Coruña repartirá este ano un total de 500.000 euros en axudas destinadas a sufragar a celebración das festas dos barrios. O concelleiro de Cultura e Turismo, Gonzalo Castro, reuniuse con representantes das asociacións e entidades veciñais, xunto con persoal técnico do IMCE, para explicar o funcionamento da convocatoria e as novidades incorporadas con respecto á edición anterior.
Segundo detallou o edil, cada entidade poderá acceder a unha contía máxima de 20.000 euros para organizar os seus eventos festivos. Poderán optar ás subvencións as asociacións veciñais sen ánimo de lucro con sede na Coruña e inscritas no Rexistro Municipal de Asociacións da Coruña (REMAC) na data límite de presentación de solicitudes.
Entre os conceptos subvencionables inclúense gastos correntes directamente relacionados coa organización das festas, como cachés e produción de espectáculos, alugueiro de material, servizos de vixilancia, xestoría e asesoría, pirotecnia, contratación de persoal sanitario, seguros de responsabilidade civil ou dereitos de autor, entre outros, sempre que se xeren dentro do período establecido.
Como mellora, o IMCE porá a disposición das entidades veciñais medios propios (mesas, cadeiras, tarimas e outros elementos, segundo dispoñibilidade) sen que iso compute como gasto da subvención. Ademais, asumirá a subministración e o custe dos baños químicos necesarios para o desenvolvemento das festas.
Castro subliñou a importancia destas celebracións pola súa dimensión social e cultural e remarcou que o Concello seguirá apoiando as festas de barrio, lembrando tamén o bo resultado da pasada edición, na que se estreou un sistema de axudas que incrementou a capacidade de autoorganización das asociacións mantendo a colaboración municipal.