O Concello da Coruña actuará en 384 fincas sen limpar para reducir o risco de incendios
O Concello da Coruña deu un novo prazo de 15 días ás persoas propietarias de 384 parcelas incluídas no ámbito de protección do Plan Municipal de Prevención e Defensa contra os Incendios Forestais (PMDIF) para que procedan á limpeza dos seus terreos.
As parcelas forman parte da rede secundaria de faixas de xestión de biomasa, na que o Concello iniciou xa en abril un proceso de comunicación cos propietarios para promover o acondicionamento das fincas e reducir o risco de propagación dos incendios.
O prazo inicial para realizar estes traballos rematou o pasado 31 de maio. Agora, as persoas propietarias das parcelas que continúen sen limpar dispoñen de 15 días naturais para cumprir voluntariamente coa súa obriga.
Se transcorrido este período non se realizaron os traballos, o Concello poderá executar a limpeza de maneira subsidiaria, repercutindo posteriormente os custos ás persoas responsables. Ademais, no caso de que sexan retiradas especies arbóreas prohibidas, poderá producirse o seu comiso.
A actuación afecta a un número de parcelas que aumentou de maneira importante tras a modificación do PMDIF aprobada este ano. O plan pasou de incluír 1.192 fincas a contemplar 2.551, mentres que a superficie protexida aumentou en 3 quilómetros cadrados, ata alcanzar un incremento do 12 %.
A ampliación busca reforzar a protección de puntos considerados especialmente sensibles nas zonas periurbanas, entre eles centros escolares, residencias de maiores, gasolineiras, a contorna da refinería, vivendas situadas en áreas rurais e os arredores da planta de Nostián.
O obxectivo é reducir a presenza de biomasa en parcelas situadas nestes ámbitos e dificultar a posible propagación do lume cara a zonas habitadas ou instalacións especialmente vulnerables.
O incumprimento das obrigas de limpeza pode ter tamén consecuencias económicas. Segundo o Concello, as sancións poden oscilar entre os 1.000 euros para as infraccións leves e os 100.000 euros para as graves, ademais do custo correspondente aos traballos de limpeza executados de forma subsidiaria.