O Concello aproba a recuperación dos baixos do baluarte do Parrote na Coruña
A Xunta do Goberno local da Coruña fixo hoxe balance das licenzas resoltas no período entre os días 2 e 9 de maio, con 134 expedientes notificados, dos que 11 foron licenzas urbanísticas e 83 foron obras en réxime de comunicado.
Como expediente particular destaca a licenza que permitirá a construción dun edificio de 66 vivendas, rochos, locais comerciais e garaxes no número 22 da rúa Montevideo, na confluencia entre a rúa Alcalde Pérez Ardá e a rolda de Outeiro. A promotora ten previsto levar a cabo un investimento de 8,6 millóns de euros nos traballos.
Tamén cómpre destacar, por outra banda, a licenza que habilitará o Club Cámara Noroeste a explotar os locais que hai no baluarte do Parrote, coa finalidade de acoller a sede do club e tamén con vistas ao desenvolvemento de proxectos de hostalería. A Cámara da Coruña estima en dous millóns de euros o orzamento de execución necesario para financiar as melloras nos locais e os seus exteriores.
“Desta forma, facilitamos a recuperación dun espazo situado nun enclave emblemático da cidade, e que actualmente estaba carente de uso en terreos da Autoridade Portuaria”, explicou o voceiro muncipal e concelleiro de Urbanismo Lage Tuñas.