O campamento 'Aventura nas Mariñas' achega á cativada de Bergondo as profesións vinculadas ao mar
O albergue da Mariña Española, en Bergondo, acolleu unha nova parada do programa 'Movemento Azul', unha iniciativa da Consellería do Mar destinada a achegar á infancia as oportunidades profesionais e o valor ambiental do sector marítimo-pesqueiro.
A actividade desenvolveuse no marco do campamento autonómico 'Aventura nas Mariñas', no que participaron arredor dun cento de nenos e nenas de entre 7 e 11 anos a través dos obradoiros didácticos de 'Un Mar de Profesións'.
Durante a xornada, os participantes puideron coñecer distintos oficios relacionados co mar mediante actividades prácticas distribuídas en tres espazos temáticos. Nun deles descubriron o funcionamento das artes tradicionais de pesca e aprenderon a comprobar as tallas mínimas dos bivalvos; noutro afondaron na biodiversidade mariña e no recoñecemento da fauna das rías galegas; mentres que unha terceira área estivo dedicada á navegación, con exercicios de orientación e manexo de cartas náuticas.
Ao remate das actividades, os nenos e nenas recibiron un 'Pasaporte de profesións do mar', un distintivo simbólico co que se pretende fomentar o seu compromiso coa protección e conservación do medio mariño.
Durante a visita ao campamento, a conselleira do Mar, Marta Villaverde, destacou a importancia de achegar ás novas xeracións as posibilidades profesionais ligadas á economía azul e de espertar o seu interese por ámbitos como a pesca, o marisqueo, a investigación ou a sustentabilidade ambiental.