O BNG reclama máis servizos e mellores conexións para o Sector 7 da Coruña
O Sector 7 volverá entrar no debate municipal da Coruña este xoves. O BNG levará ao pleno unha moción para reclamar actuacións nun barrio que, segundo denuncia a formación, medrou con vivendas antes de contar cos servizos e equipamentos necesarios para garantir unhas condicións axeitadas de vida.
O concelleiro nacionalista David Soto alerta de que a veciñanza leva tempo trasladando problemas de limpeza, falta de iluminación e malas conexións cos barrios próximos. A situación, sostén, é especialmente visible na contorna de ExpoCoruña, onde a iluminación resulta insuficiente, e nos accesos cara a Mesoiro e Mato Grande, que continúan a ser pouco cómodos para os desprazamentos a pé.
Un dos puntos centrais da moción é a propia configuración urbana do barrio. O BNG sinala que a avenida García Sabell divide o Sector 7 en dúas partes e dificulta a mobilidade diaria, ata o punto de que parte da veciñanza se ve obrigada a empregar o coche para xestións básicas como facer a compra.
A formación tamén pon o foco nos problemas que se producen durante os grandes eventos en ExpoCoruña e no Coliseum. Para esas xornadas, propón mellorar a ordenación do tráfico, reforzar a presenza da Policía Local, habilitar zonas de aparcadoiro para usuarios e incrementar as conexións en autobús.
No apartado de mantemento, o BNG pide aumentar a frecuencia das rozas para evitar que a maleza invada as beirarrúas e deteriore aínda máis a imaxe e a accesibilidade da zona.
A moción inclúe ademais unha demanda de carácter sanitario. Os nacionalistas solicitan que o Goberno local realice xestións ante a Consellaría de Sanidade para estudar a posible apertura dun centro de saúde que dea servizo ao Recinto Feiral-Sector 7, Someso e As Rañas.