O BNG denuncia o impacto das obras no cruce da N-VI en Guísamo e pide medidas
O portavoz do BNG no Congreso, Néstor Rego, presentou unha iniciativa para pedirlle ao Ministerio de Transportes que se adopten medidas polo impacto e os danos que as obras están a causar nas vivendas próximas ás obras de mellora da seguranza viaria no cruce da N-VI en Guísamo.
O nacionalista lembra que en maio de 2022, "despois unha década de reivindicacións da veciñanza, apoiadas polo BNG, o Ministerio de Transportes adxudicaba por fin as obras para mellorar a o cruce entre a N-VI e a estrada de Ferrol á altura de Guísamo, no concello de Bergondo, para eliminar un punto negro de alta sinistralidade".
Unhas vivendas que deben ser reparadas
Coas obras en marcha en 2023, a veciñanza alertou de efectos nas vivendas cando se emprega determinada maquinaria: as vivendas vibran, o que levou a aparición de danos tais como fendas e caída de revestidos de alicatados. De momento, hai unha ducia de casas afectadas que foron visitadas polo voceiro municipal en Bergondo, David Carro, quen escoitou as reclamacións dos veciños e das veciñas.
Rego dneuncia que este problema se puxo en coñecemento dos responsábeis da empresa e tamén do concello sen que se adoptasen medidas nin se efectuase unha inspección dos desperfectos causados.
O deputado do BNG deixa claro que en ningún momento se cuestiona a necesidade destas actuacións, longamente demandadas, mais "é de xustiza que se lles garanta que as súas vivendas fiquen no mesmo estado que tiñan antes das obras".
A zona precisa unha correcta iluminación e sinalización
Doutr banda, outra cuestión que se pon enriba da mesa é a escasa iluminación desta zona en obras e a deficiente sinalización, algo que é preciso corrixir.
Rego pregunta ao Ministerio se vai adoptar medidas para solucionar este problema nas vivendas e demanda que se reparen os danos nas vivendas afectadas unha vez finalizada a actuación. Ademais, solicita que a correcta iluminación e sinalización das obras para evitar accidentes.