O barrio de Eirís celebra o martes 20 de agosto a Festa da Fresa con actividades para todas as idades
A Festa da Fresa no barrio coruñés de Eirís, organizada pola Asociación de Veciños Uxío Carré, será unha celebración vibrante que mesturará tradición, cultura e entretemento para todas as idades. O evento, que terá lugar o martes 20 de agosto, promete unha xornada chea de actividades.
Desde as 17.00 horas, a festa comezará con música e baile tradicional, seguido dun paseo guiado pola horta municipal "Leira das Freces". Ás 18.00 horas, os máis pequenos poderán gozar dun espectáculo de títeres a cargo de Micromina, mentres que os afeccionados ao fútbol poderán presenciar o VII Torneo de Fútbol Festa da Fresa, con encontros entre equipos locais.
Un dos momentos máis destacados será a apertura da exposición de fresas ás 18.30 horas, seguida dunha degustación gratuita ás 19.00 horas. A programación infantil continuará ás 19.30 horas cun espectáculo de maxia da man da maga Fani.
Mónica, presidenta da Asociación de Veciños, destacou a importancia desta festa para o barrio: "Un ano máis celebramos a Festa da Fresa no parque de Eirís, unha celebración que leva moitísimos anos xa no barrio e que todas as persoas que se achegan desfrutan moito dela porque é unha festa para compartir, para desfrutar do lugar e da diversión. É un lugar ideal para deitarse ao sol e para botar uns bailes durante a verbena".
Mónica tamén resaltou a emoción de contar coa actuación de Lidia Sueiro, unha veciña de Eirís que durante o confinamento regalaba miniconcertos cada noite despois das 20.00 horas, cando a xente saía a aplaudir ás fiestras. "Lévabamos moito tempo querendo traela a actuar na Festa da Fresa para que a xente puidera poñerlle cara a esa voz que nos acompañaba durante ese tempo duro da pandemia", comentou.
A xornada culminará coa música de Lidia Sueiro ás 21.30 horas, seguida dunha verbena coa orquestra "Foliada d'Ases" a partir das 22.45 horas, pechando así un día de celebración que seguramente deixará un recordo especial en todos os asistentes. Mónica tamén animou especialmente a aqueles que non están acostumados a asistir a esta festa: "Fresas e amorodos para todo o mundo, especialmente para os máis cativos, actuacións infantís e moita música. Ánimo á xente a que se achegue e coñeza a nosa festa".
