Novas bolsas impulsarán o talento feminino en carreiras STEM na UDC
A Universidade da Coruña suma unha nova iniciativa para atraer talento feminino ás carreiras científicas e tecnolóxicas. A UDC e Nunsys Group abriron a convocatoria das Bolsas Sof.ia, un programa que cubrirá os dous primeiros cursos universitarios a alumnas que queiran estudar graos STEM, vinculados á ciencia, á tecnoloxía, á enxeñaría e ás matemáticas.
A convocatoria chega nun contexto no que a presenza feminina segue sendo baixa nestas titulacións. Aínda que as mulleres representan máis do 55% do alumnado universitario, en Galicia só son o 34% nas carreiras STEM. No caso da Enxeñaría Informática na UDC, a porcentaxe de mulleres matriculadas en primeiro curso pasou do 8% en 2010 ao 19% no curso 2023-2024, unha mellora aínda insuficiente para pechar a fenda de xénero.
As bolsas están dirixidas a persoas con identidade de xénero feminina residentes en España que superen este ano segundo de bacharelato ou un ciclo formativo de grao superior e queiran iniciar unha titulación universitaria do ámbito tecnolóxico. O prazo para presentar solicitudes está aberto desde o 15 de maio e rematará o 15 de xuño ás 14.00 horas.
Na UDC, as beneficiarias poderán escoller entre graos como Enxeñaría Informática, Ciencia e Enxeñaría de Datos, Enxeñaría Industrial, Enxeñaría de Tecnoloxías Industriais, Electrónica Industrial e Automática, Deseño Industrial e Desenvolvemento de Produtos, Enxeñaría Eléctrica, Enxeñaría Mecánica ou Intelixencia Artificial.
A axuda cubrirá a matrícula dos dous primeiros cursos académicos. Para mantela no segundo ano, as bolseiras deberán superar polo menos o 75% dos créditos do primeiro curso. A selección farase principalmente en función da excelencia académica recollida nas bases da convocatoria.
O programa incorpora tamén acompañamento durante a etapa universitaria. As estudantes contarán con mentoría de profesionais de Nunsys Group e poderán acceder a prácticas formativas remuneradas tras superar o primeiro ciclo académico, unha vía pensada para achegalas ao mercado laboral desde os primeiros anos de formación.
Ademais da Universidade da Coruña, participan nesta convocatoria outras seis universidades públicas españolas. A iniciativa conta co apoio de TD SYNNEX e busca reforzar a presenza de mulleres nun sector no que a desigualdade tamén se nota no emprego, xa que só un de cada catro postos STEM en España está ocupado por unha muller.
O reitor da UDC, Ricardo Cao, puxo en valor a colaboración entre universidade e empresa para xerar oportunidades en titulacións estratéxicas. Pola súa banda, o delegado en Galicia de Nunsys Group, Gabriel Barreiro, destacou que o obxectivo das bolsas é axudar a reducir a fenda de xénero e acompañar ás futuras profesionais no seu desenvolvemento académico e laboral.