Miño pecha a adxudicación do Servizo de Axuda no Fogar á Fundación FEPAS
O Concello de Miño vén de adxudicar de maneira definitiva o Servizo de Axuda no Fogar á Fundación FEPAS, unha vez rematado o prazo de 15 días hábiles establecido para a presentación de alegacións sen que se rexistrase ningunha.
Con este paso, a administración local busca dar resposta á situación vivida nos últimos meses polas persoas usuarias, as súas familias e o persoal do servizo, marcada, segundo indica o goberno municipal, pola deficiente execución do contrato por parte da anterior empresa adxudicataria.
O seguinte trámite será a formalización do contrato coa nova entidade, un paso necesario para iniciar a transición do servizo co obxectivo de asegurar en todo momento a continuidade da atención domiciliaria.
O alcalde de Miño, Manuel Vázquez Faraldo, subliñou que o Concello mantivo un contacto continuo coas traballadoras e coas persoas usuarias desde que se trasladaron as primeiras queixas. Segundo explicou, a prioridade do executivo local foi acreditar os incumprimentos da empresa anterior para poder actuar en consecuencia.
O rexedor engadiu que o goberno municipal procurou actuar coa maior rapidez posible dentro das marxes legais e seguindo os criterios técnicos de Intervención e Secretaría. Faraldo insistiu en que a prioridade durante todo o proceso foron as persoas usuarias e as traballadoras, ao tratarse dun servizo de primeira necesidade.
Por último, o alcalde agradeceu a comprensión e a paciencia amosadas durante un procedemento que cualificou de especialmente complexo e delicado para todas as partes implicadas.