Sucesos

O Concello de Culleredo pide á Xunta que comprobe as condicións da autorización e manterá unha supervisión estrita sobre a limpeza e o estado da contorna do Rego das Xesteiras

O Concello de Culleredo deu un novo paso na revisión da tala realizada na parroquia de Celas, despois do aviso veciñal pola posible afección á contorna do Rego das Xesteiras. Tras a primeira inspección da Policía Local e as comprobacións realizadas polo departamento municipal de Medio Ambiente, o goberno local trasladou a información á Consellería do Medio Rural para que a Xunta aclare en que condicións se autorizou a actuación.

A empresa madeireira que executaba os traballos comunicou ao Concello que conta cun permiso da Xunta de Galicia para a corta, acompañado de informes de Patrimonio e de Augas de Galicia. Con todo, o consistorio quere que a Administración autonómica verifique se a intervención se desenvolveu dentro dos límites autorizados ou se puido haber excesos na superficie afectada ou na tipoloxía das especies retiradas.

Na inspección municipal constatouse que a maioría das árbores cortadas eran eucaliptos, aínda que tamén se observaron restos de bidueiros, piñeiros e loureiro. Esa circunstancia levou ao Concello a solicitar unha comprobación máis detallada, especialmente pola sensibilidade ambiental da zona e pola proximidade ao Rego das Xesteiras.

O Concello tamén puxo os feitos en coñecemento do Distrito Forestal, que desprazou axentes con funcións de inspección á área afectada. A intención do goberno municipal é manter o seguimento do expediente e coñecer o resultado das comprobacións para actuar no caso de que se detecten incumprimentos.

En paralelo, o consistorio requiriu aos madeireiros a regularización da taxa e da comunicación pertinente no rexistro municipal, tal e como establece a ordenanza. Ademais, a empresa deberá efectuar a retirada completa dos restos da tala, un compromiso que, segundo o Concello, os responsables dos traballos aseguraron que cumprirán.

O goberno local advirte de que manterá unha 'supervisión estrita' para garantir que a contorna do Rego das Xesteiras quede en perfecto estado. No caso de que se determinen danos na zona ou incumprimentos nas condicións da corta, o Concello esixirá as medidas oportunas aos responsables.

Desde o executivo municipal tamén agradeceron a colaboración da veciñanza e da Asociación O Val de Culleredo, que deron aviso dos feitos e permitiron activar a intervención municipal. O Concello defende que esa colaboración cidadá resulta clave para protexer o medio natural e detectar posibles actuacións irregulares en espazos sensibles.