Máis voos e máis presión sobre Alvedro polo peche temporal de Santiago
O peche temporal do aeroporto de Santiago-Rosalía de Castro entre o 23 de abril e o 27 de maio alterará durante cinco semanas o mapa aéreo galego e situará a Alvedro ante un escenario pouco habitual. A infraestrutura compostelá suspenderá completamente as operacións de despegue e aterraxe durante eses 35 días para acometer a renovación do pavimento da pista, ademais doutras actuacións sobre balizamento, drenaxe e sistemas de axuda á aterraxe con baixa visibilidade. As obras, que xa viñan desenvolvéndose en horario nocturno desde o 13 de xaneiro, buscan alongar a vida útil da pista e reforzar a seguridade operativa.
A principal consecuencia dese parón verase en A Coruña. Segundo Aena, Alvedro absorberá a maior parte da operativa que as compañías decidiron trasladar desde Santiago e pasará de ter 856 voos programados para ese período a un total de 1.486, é dicir, 630 máis e un incremento superior ao 70 por cento. O salto notarase xa desde o primeiro día do peche, ao pasar de 34 voos o 22 de abril a 44 o día 23, e en maio haberá xornadas con máis de 50 operacións.
O cambio tamén se deixará sentir na oferta de destinos. Durante esas semanas, Alvedro sumará temporalmente cinco conexións habituais de Santiago: Palma de Mallorca, Sevilla, Málaga, Londres e París. Eses enlaces engadiranse ás rutas que xa opera na actualidade o aeroporto coruñés, que chega a este reforzo despois dun primeiro trimestre á alza, con 313.632 pasaxeiros acumulados e 116.504 só en marzo.
Para asumir ese aumento de actividade, Aena activou un plan de reforzo que inclúe preto de 700 novas prazas de estacionamento, un aparcadoiro provisional conectado co aeroporto mediante autobús gratuíto e un itinerario peonil, unha nova bolsa de taxis xunto ao parking xeral, 60 prazas máis para vehículos de alugueiro e unha reordenación dos accesos para gañar fluidez. A iso súmanse reforzos en limpeza, mantemento, seguridade, filtros e asistencia a persoas con mobilidade reducida.
No caso do taxi, a maior afluencia prevista xa obrigou a introducir unha medida excepcional. Durante o peche de Santiago, todos os vehículos con autorización no Concello da Coruña poderán prestar servizo en Alvedro, co obxectivo de adaptar a oferta á demanda adicional que se agarda na terminal de Culleredo.
Para os pasaxeiros, a recomendación segue a ser comprobar coa súa compañía aérea posibles cambios de horario, reubicacións ou modificacións no aeroporto de saída e chegada. O propio aeroporto de Santiago xa advirte na súa web de que durante o peche non se realizará ningunha operación aérea, polo que a reorganización afectará tanto ás rutas como aos desprazamentos por estrada cara a Alvedro ou outros aeroportos. O que se abre agora é un mes longo no que A Coruña gañará peso no sistema aeroportuario galego, aínda que de forma temporal e condicionado polo remate das obras en Lavacolla.