Máis de cen persoas participan na primeira ruta de sendeirismo do programa “Ven e descubre” en Oleiros
Máis dun cento de veciños e veciñas participaron na ruta “Camiñando por Oleiros”, a primeira proposta de sendeirismo incluída no programa municipal “Ven e descubre”, unha iniciativa impulsada polo Concello para promover o envellecemento activo, a convivencia e o achegamento ao patrimonio local.
A elevada demanda rexistrada obrigou a distribuír a actividade en tres xornadas diferentes, celebradas os días 19, 26 e 27 de maio. Deste xeito, os participantes repartíronse en tres grupos para garantir tanto a seguridade como o desfrute do percorrido, adaptado ás necesidades e ao ritmo das persoas asistentes.
O itinerario, de 13 quilómetros de lonxitude, desenvolveuse polas parroquias de Iñás e Nós, atravesando algúns dos espazos naturais e paisaxísticos máis destacados do municipio. Entre os lugares visitados figuraron o paseo fluvial de Nós-Iñás, diferentes áreas boscosas e fragas, así como os xardíns da Finca Las Cadenas.
Ademais do contacto coa natureza, a actividade incorporou un importante compoñente divulgativo. Ao longo da ruta, os participantes recibiron explicacións sobre distintos elementos do patrimonio etnográfico e hidráulico de Oleiros, visitando enclaves como o antigo muíño de carbón e varios lavadoiros tradicionais, espazos que durante décadas desempeñaron un papel esencial na vida cotiá e comunitaria da veciñanza.
Un dos aspectos máis destacados da experiencia foi o intercambio de lembranzas e testemuños entre os asistentes. Moitas das persoas participantes compartiron vivencias relacionadas cos muíños, fontes e lavadoiros visitados, contribuíndo así á recuperación da memoria colectiva e ao coñecemento dos antigos oficios e formas de convivencia que marcaron a historia local.
Desde a organización destacan que iniciativas como “Ven e descubre” permiten non só poñer en valor o patrimonio material do municipio, senón tamén conservar o legado inmaterial transmitido pola veciñanza. Neste sentido, subliñan que a protección destes espazos pasa tamén por preservar as historias e recordos das persoas que os utilizaron ao longo dos anos, reforzando así a identidade e a memoria comunitaria de Oleiros.