Máis de cen grupos poderán participar nas actividades culturais e deportivas de Culleredo este curso
O Concello de Culleredo prepara unha nova edición do programa de Actividades Municipais Culturais e Deportivas, que durante o curso 2026/2027 ofrecerá máis dunha vintena de propostas en diferentes centros cívicos e sociais do municipio. As actividades, que contan coa colaboración da Deputación da Coruña, comezarán durante a primeira quincena de outubro.
A programación está dirixida a persoas de diferentes idades e reúne propostas culturais, formativas, deportivas e de ocio, co obxectivo de achegar estas actividades aos distintos núcleos de Culleredo.
Entre as propostas culturais para adultos atópanse baile de salón, swing, óleo, labores de agulla e fío, artesanía galega, patchwork, confección, guitarra, inglés, informática e 'Conéctate', un obradoiro pensado para axudar aos participantes a familiarizarse co uso de móbiles e tabletas.
Os nenos e nenas tamén terán as súas propias actividades, entre elas deseño de videoxogos e os obradoiros de cociña CullerChef.
Unha ampla oferta deportiva
O programa inclúe ademais diferentes alternativas deportivas para adultos, como adestramento funcional, ritmo zum fitness, pilates, ximnasia de mantemento, ioga, hipopresivos e chan pélvico ou marcha nórdica.
Para os máis pequenos ofertaranse actividades de patinaxe, psicomotricidade e ximnasia rítmica.
En total, a iniciativa prevé a creación de máis dun centenar de grupos de participantes, que desenvolverán as diferentes actividades en puntos de O Burgo, Almeiras, Fonteculler, Celas, Cordeda, Castro Laxe, Ledoño, Boedo, Bregua, Castelo, Tarrío, Orro, Sueiro, Sésamo e Vilaboa.
As preinscricións comezarán en setembro
O prazo de preinscrición estará aberto do 3 ao 11 de setembro, en horario de 09.00 a 14.00 horas. As solicitudes poderán realizarse presencialmente no Edificio de Servizos Múltiples do Burgo, por correo electrónico en escolasmunicipais@culleredo.es ou a través da Sede Electrónica municipal.
Cada persoa poderá solicitar un máximo de dúas actividades, escollendo un único grupo por cada unha delas. Naqueles grupos nos que haxa máis solicitudes que prazas dispoñibles realizarase un sorteo o 18 de setembro. Ese mesmo día publicaranse as listas de persoas admitidas e de espera.
O período de matrícula será do 21 ao 25 de setembro, mentres que o 5 de outubro darase a coñecer a oferta de prazas vacantes. Estas poderán solicitarse a partir do día seguinte no Edificio de Servizos Múltiples do Burgo.