Máis de 260 persoas participan na elección do futuro da ampliación do Campo da Feira de Carral
A veciñanza de Carral respondeu de forma masiva á consulta impulsada polo Concello para decidir o futuro uso da ampliación do Campo da Feira. Un total de 265 persoas participaron neste proceso participativo, no que a pista multideporte se converteu na alternativa con maior respaldo, aínda que por unha marxe moi reducida sobre a creación dunha zona con mesas e bancos para o descanso.
Do total de respostas recollidas, o 85,28 % realizouse a través do formulario habilitado na internet, mentres que o 14,72 % restante correspondeu aos votos depositados na urna presencial instalada polo Concello.
A concelleira de Educación, Sanidade e Emprego, Cristina Casal, agradeceu a participación da cidadanía e destacou que a implicación da veciñanza resulta fundamental para atopar o uso máis adecuado para este novo espazo. Segundo explicou, o seguinte paso será analizar as diferentes alternativas para comprobar a súa viabilidade tanto desde o punto de vista económico como técnico.
A opción máis votada foi a construción dunha pista multideporte, que obtivo 88 apoios, o que representa o 33,21 % do total. Moi preto situouse a proposta de habilitar unha área con mesas e bancos para o descanso, que recibiu 86 votos, equivalentes ao 32,45 %.
Pola súa banda, o 28,68 % das persoas participantes apostou por presentar propostas diferentes ás inicialmente formuladas polo Concello. Entre as ideas trasladadas figuran a creación dunha zona de aparcamento, a instalación de baños públicos, unha pista de calistenia, un parque biosaudable ou un espazo verde.
A alternativa dunha zona destinada aos patinetes foi a que obtivo un menor apoio, ao reunir o 5,66 % dos votos.
Unha vez se determine a opción definitiva, o Concello destinará os preto de 650 metros cadrados gañados coa ampliación do Campo da Feira á creación de novos servizos e equipamentos para mellorar este espazo público e ampliar as prestacións á veciñanza.