Máis de 2,1 millóns de euros de remanente abren a porta a novos investimentos en Miño
O pleno extraordinario aprobou a Conta Xeral de 2025, que deixa un remanente de 2.174.840 euros para gastos xerais. Esta liquidez permite ao Concello dispoñer de marxe para continuar impulsando investimentos e novas actuacións no municipio.
Parte destes fondos xa están sendo utilizados en diferentes proxectos. Entre eles figuran a mellora das beirarrúas das rúas Cobo, Loios, Marismas e Estrada da Praia, a rehabilitación dos firmes das rúas Barrosa, Carreira e Raxel e a ampliación da cuberta do campo de fútbol de Gallamonde.
As contas tamén reflicten a evolución do endebedamento municipal. A débeda pasou dos 19 aos 19,3 millóns de euros ao peche do exercicio.
Este incremento explícase principalmente polo préstamo de 974.000 euros contratado para afrontar os últimos pagamentos ás persoas expropiadas de Costa Miño. Ao mesmo tempo, durante 2025 amortizáronse 730.000 euros de débeda.
O Goberno local defende que a situación financeira permite continuar facendo fronte ás obrigas pendentes sen renunciar ao desenvolvemento de novos proxectos.
O acordo co Ministerio de Facenda establece actualmente cotas anuais duns 400.000 euros e amplía o prazo de pagamento ata 2060, co obxectivo de seguir reducindo progresivamente o endebedamento.