Máis de 120.000 euros para reforzar o transporte de programas educativos e rutas culturais na Coruña
O Concello da Coruña destinará máis de 120.000 euros á contratación do servizo de transporte para os programas educativos municipais e para as saídas socioculturais que se organizan a través da rede de centros cívicos. O contrato, actualmente en fase de licitación, terá un prazo de execución dun ano.
O servizo permitirá manter os traslados gratuítos en autocar para o alumnado que participa nas actividades promovidas polo Concello, especialmente nos centros públicos da cidade. Desde o Goberno local destacan que este apoio resulta clave para facilitar a participación dos escolares en propostas complementarias ao ensino regrado.
A contratación tamén inclúe o transporte das excursións culturais por Galicia dirixidas a persoas maiores de 50 anos. Este ano, a programación ofreceu 1.080 prazas gratuítas e dúas rutas diferentes, con destinos en Baiona-Pontevedra e Lugo-Portomarín, desenvolvidas durante os meses de abril e maio.
O concelleiro de Educación, Formación e Innovación Dixital, Juan Ignacio Borrego, sinalou que estes recursos permiten manter un programa cultural 'accesible e inclusivo' e facilitar que centos de persoas poidan coñecer mellor Galicia sen custo para as persoas participantes.