Luís Celeiro asinará exemplares de 'Andares' na Feira do Libro da Coruña
O escritor e xornalista sarriao Luís Celeiro estará presente este venres, 7 de agosto, na Feira do Libro da Coruña para asinar exemplares da súa obra Andares. A cita terá lugar a partir das 19.00 horas na caseta compartida por Editorial Canela e Libros Lar.
Publicado por Lar Libros e a Asociación de Periodistas e Estudosos do Camiño de Santiago, Andares reúne unha selección de artigos da sección Tía Manuela, que Celeiro vén publicando semanalmente en distintos xornais galegos desde agosto de 2015. A obra recolle máis de trescentas páxinas de reflexións e textos de opinión centrados na actualidade, na realidade social e cultural de Galicia e nos acontecementos que marcan a vida diaria da cidadanía.
Os artigos abordan cuestións relacionadas co país, coas súas xentes e coa cultura galega, sempre desde unha perspectiva baseada no sentido común e na análise próxima dos feitos. Segundo destaca o propio autor, trátase de textos que buscan ofrecer espazo e voz a quen máis o precisa e fomentar a reflexión arredor de asuntos de interese colectivo.
A selección dos textos foi realizada polo profesor e músico Jei Noguerol, mentres que o limiar da publicación corre a cargo do xornalista Xosé María García Palmeiro. A presenza de Celeiro na Feira do Libro da Coruña permitirá aos lectores achegarse á súa obra e compartir impresións cun autor que leva anos cultivando a columna de opinión na prensa galega.