Literatura, música e relatos curtos para celebrar as Letras Galegas en Paderne
A literatura e a música serán as grandes protagonistas da celebración do Día das Letras Galegas en Paderne. O Concello prepara para o vindeiro 17 de maio unha programación especial que combinará actuacións, narración oral, recoñecemento á creación literaria e actividades pensadas para compartir coa veciñanza.
Os actos comezarán ás 12.00 horas na Praza do Campo da Escola, en Ínsua, Viñas. A programación contará coa participación da UNED Sénior e coa actuación de Alba de Vales, que presentará o espectáculo 'Contos arredor de nós', unha proposta vencellada á palabra, á tradición oral e á memoria compartida.
Durante a xornada tamén se fará entrega do premio do III Certame de Relato Curto organizado polo Concello, unha iniciativa coa que se busca fomentar a escrita e poñer en valor a creatividade literaria no municipio.
A celebración completarase co reparto de libros entre os veciños e veciñas asistentes, ademais dun ágape de cortesía para conmemorar unha data de especial importancia para a cultura galega.
Con esta programación, Paderne súmase un ano máis á homenaxe colectiva ás letras do país, cunha proposta que combina cultura, participación veciñal e promoción da lingua galega.