Invístense 342.792 euros na eficiencia enerxética e na accesibilidade do polideportivo de Guísamo
Esta semana deron comezo as obras de mellora de eficiencia enerxética e de accesibilidade do polideportivo de Guísamo. Esta actuación, orzada polo Concello de Bergondo en 342.792 euros, busca mellorar o illamento térmico e lograr un aforro enerxético; así como mellorar a comodidade do espazo, facéndoo máis amable no seu uso.
O proxecto contempla a mellora da cuberta, colocando un illamento térmico de la de vidro; a substitución da caldeira de gasoil por unha de biomasa, que, ademais de abastecer de auga quente a vestiarios e aseos, alimentará a 8 aerotermos para dotar ao edificio dunha calefacción con enerxía renovable; a renovación total da actual iluminación por outra de tecnoloxía LED; a mellora da ventilación da pista e a instalación dunha tubaxe de drenaxe para evitar a entrada de auga desde o terreo ao interior do edificio.
No referido á accesibilidade, contémplase a reforma dos aseos e vestiarios, adaptándoos a persoas con mobilidade reducida; e tamén se proxecta a instalación dun salvaescalera para poder subir á bancada.
Durante o transcurso das obras inhabilitaranse algunhas prazas de aparcamento na zona para un mellor desenvolvemento dos traballos.
Dende o goberno local de Bergondo destacan “a importancia deste tipo de obras para as arcas municipais, xa que, ademais de mellorar as instalacións, facéndoas máis modernas e adaptadas ás necesidades de todas as persoas, permítennos aforrar diñeiro grazas ás novas tecnoloxías, renovables e de menor impacto ambiental”. Ademais, tamén agradecen “a desinteresada colaboración do persoal do CPAP de Fiobre, que asesoraron sobre as cuestións de accesibilidade no proxecto”.