Fronte Ampla comprométese a nacionalizar a AP-9 e eliminar as peaxes
Fronte Ampla comprometeuse a impulsar a nacionalización da AP-9 e a eliminar as peaxes se conta con representación no próximo Goberno do Estado. A formación trasladou esta proposta durante unha acción celebrada hoxe baixo o lema "AP-9 galega e gratuíta", na que participaron o seu portavoz e candidato ao Senado, Paulo Carlos López; o deputado Manuel Lago, e Trinidad Palacios, número dous da candidatura pola Coruña.
Durante a intervención, López responsabilizou o Partido Popular da situación actual da autoestrada e sinalou os expresidentes José María Aznar e Manuel Fraga, así como Alberto Núñez Feijóo, polas decisións que, segundo denunciou, levaron á privatización e ás sucesivas prórrogas da concesión. "Hoxe estamos aquí para sinalar aos responsables políticos de que a cidadanía galega siga pagando peaxes a día de hoxe, e chámanse José María Aznar, Manuel Fraga e Alberto Núñez Feijóo. Eles privatizaron e prorrogaron o que ten que ser un servizo público", afirmou.
O portavoz cualificou de "insoportable" o desembolso que supón utilizar esta infraestrutura para a poboación galega. Como exemplo, indicou que un traxecto de ida e volta entre A Coruña e Vigo supera os 40 euros, unha cantidade que pode achegarse aos 200 euros mensuais no caso dunha persoa que necesite realizar ese desprazamento catro días ao mes. López tamén criticou o custo que soportan os usuarios e asegurou que "cada vez que unha persoa pase por unha peaxe da AP-9 ten que escoitar a sintonía do PP".
Fronte Ampla reivindicou tamén o traballo desenvolvido no Congreso a través da súa representación en Sumar, coa participación de Verónica Barbero e Manuel Lago, para sacar adiante a lei que permite transferir a titularidade da autoestrada a Galicia. "Comprometémonos a facelo e fixémolo. Agora tócalle á Xunta chegar a un acordo", sinalaron desde a formación.
Porén, consideran que a transferencia non abonda para resolver o problema das peaxes e defenden que a infraestrutura debe pasar a ser galega e gratuíta. "A cidadanía galega quere que a AP-9 sexa galega e gratuíta. Imos rematar o traballo", aseguraron. Neste sentido, pediron concentrar o voto progresista en Fronte Ampla para conseguir unha representación suficiente que permita avanzar cara á supresión dos pagamentos. "A mobilidade en Galicia é fundamental e comprometémonos: coa Fronte Ampla, AP-9 galega e gratuíta xa", concluíron.
Pola súa banda, Manuel Lago expuxo os cálculos económicos cos que a coalición xustifica a súa proposta de rescate e nacionalización. Segundo os datos presentados polo deputado, o Goberno ten comprometido o pagamento de 3.400 millóns de euros ás multinacionais propietarias da AP-9 desde a actualidade ata 2048.
Como alternativa, Fronte Ampla propón recuperar de inmediato a autoestrada mediante unha compensación ás concesionarias. A formación sitúa o valor real de mercado da infraestrutura por debaixo dos 1.400 millóns de euros, polo que considera máis conveniente realizar ese investimento agora que manter os pagamentos previstos durante as próximas décadas. "En vez de seguir pagando esa cantidade desorbitada durante décadas ás multinacionais, nós dicimos que invistamos hoxe 1.400 millóns de euros", explicou Lago.