Eva Villaver explicará na Coruña a ciencia e os mitos que rodean ás eclipses
A astrofísica Eva Villaver, subdirectora do Instituto de Astrofísica de Canarias, ofrecerá o vindeiro 11 de agosto na Sede Afundación A Coruña a conferencia 'Eclipses: maxia, medo… e ciencia', unha actividade aberta ao público que busca achegar á cidadanía un dos fenómenos máis fascinantes do ceo.
A charla terá lugar ás 19.00 horas e será de entrada gratuíta previa reserva na web de Ataquilla. Villaver fará un percorrido pola historia cultural e científica das eclipses, desde as antigas interpretacións vinculadas ao medo ou á maxia ata o seu papel actual como ferramenta para coñecer mellor o universo.
Durante a conferencia, o público poderá descubrir como estes fenómenos axudaron a estudar a atmosfera terrestre, comprender a dinámica do sistema solar e comprobar teorías fundamentais da física moderna. A actividade está pensada para todos os públicos e non require coñecementos previos.
Eva Villaver é unha investigadora de referencia internacional. Doutora pola Universidade de La Laguna, desenvolveu parte da súa carreira en institucións como a NASA, a Axencia Espacial Europea, a Universidade Autónoma de Madrid e o Centro de Astrobioloxía. A súa investigación céntrase na evolución dos sistemas planetarios, as ananas brancas e o estudo de exoplanetas.
A conferencia forma parte das actividades abertas do congreso internacional 'Invisibles26', que reunirá na Sede Afundación A Coruña, do 10 ao 14 de agosto, especialistas mundiais en física de partículas, cosmoloxía e astrofísica.